Atyraý oblysynyń soty segiz jyl buryn asa aýyr qylmys jasaǵan A.Kýjanazarov esimdi azamatqa úkim shyǵardy, dep habarlaıdy Qamshy.kz aqparat agenttigi. 

2010 jyly Kýjanazarov Aıda esimdi tanysyn izdep Atyraýǵa keledi. Alaıdy tanysy úsh balasy bar turmystaǵy áıel bolyp shyǵady.

A.Kýjanazarov Tarazǵa qaıtýǵa bel býyp, Aıdaǵa ózin shyǵaryp salýdy ótingen. Jolǵa mas kúıinde shyqqan ol áıelge aldymen bar ókpesin aıtyp, artynsha ony  19 jerinen pyshaqtaıdy. Tanysyn óltirip alǵanyn túsingen azamat poıyzǵa otyryp ún-túnsiz qaladan ketip qalǵan.

Týǵan jerine kelgen A.Kýjanazarov áýeli tamyryn kesip, ómirimen qosh aıtyspaq bolǵan. Keıinirek qys ortasynda mas kúıinde dalada qalyp, denesin úsik shalyp, birden eki aıaǵynan aıyrylǵan. Múgedek bolyp qalǵan soń, arada segiz jyl ýaqyt ótip, jasaǵan qylmysyn moıyndaý úshin Atyraý qalasyna kelgen.

Qylmystyq is Atyraý oblysynyń qylmystyq ister boıynsha aýdanaralyq mamandandyrylǵan sotynda qaraldy.

Sot A.Kýjanazarovtyń jasaǵan qylmysyn ózi moıyndap kelgenin eskerdi. Qylmyskerge «kisi óltirý» baby boıyna segiz jyl bas bostandyǵynan aıyrý jazasy taǵaıyndaldy. Sottalýshy jazasyn qatań rejımdi kolonıada óteıtin bolady.