Bıyl  Maqtaral  aýdanynda  20 gektarǵa  jýyq  jerge  tuqymbaq salynatyn bolady. Bul bastama Ózbekstan  Respýblıkasymen birlesken túrde  júzege  asyrylmaq. Osy maqsatta Maqtaral aýdanynan arnaıy  jer telimi bólinip, Myrzashól óńiriniń klımatyna qolaıly, jersinetin dal-daraqtardyń kóshetteri ósirilmek. Sondaı-aq, aýdandaǵy kanal jáne aryq-atyzdardyń jaǵalaýlaryna tegis batpaqty saýyr (balotnyı kıparıs) aǵashy otyrǵyzylatyn bolady. Bul týraly aýdan ákimdiginde ótken jıynda  óńir basshysy Jamantaı Beısenbaev málim etti.

Ázirge atalǵan jobany júzege asyrý maqsatynda kelissózder júrgizilýde. Ózbekstan jaǵy bul usynysty tez arada iske asyryp,  birlesken tuqymbaq jumysyn jandandyrýǵa barynsha kúsh salamyz dep otyr.  Aýdan ákimi jaýapty sala basshylaryna jaqyn arada arnaıy jer telimin bólip, akt ázirlep, zertteý-zerdeleý jumystaryn bastaýdy tapsyrdy.

 «Eger atalǵan jobamyz iske assa, aýdan klımatyna qolaıly tal-daraqtardy ósirý qolǵa alynatyn bolady. Bul birinshiden, Myrzashól topyraǵyna jersinbeıtin, ósý kórsetkishi tómen, sapasyz kóshetterge jumsalatyn qyrýar qarjyny únemdeýge septigin tıgizedi. Ekinshiden, aýdandy abattandyrý, kógaldandyrý maqsatyndaǵy oblys ákiminiń «Shatqal» baǵdarlamasyn oıdaǵydaı júzege asyrýǵa múmkindik beredi», - dedi Jamantaı Qanaıuly.

Myrzashól óńiriniń  klımaty  kontınenttik sanalady. Munda qys óte  qysqa, birshama jumsaq, al  jazy ystyq, ańyzaqty bolyp keledi. Osyny eskergen aýdan basshysy aldaǵy ýaqytta óńirdegi batpaqty jerlerge batpaqty saýyr (balotnyı kıparıs) aǵashyn otyrǵyzý qajettigine toqtaldy. Atalǵan aǵash ottegi joq, batpaqta, sazdy jerlerde jylyna 2,5 metrge deıin ósedi. Qabyǵy juqa bolady. Aǵash dińine jabysyp ósken súıesinniń (orhıdıa) aýa tamyrlary negizinen aǵash qabyǵynan syrǵyp aqqan sý men jańbyr sýyn sińiredi.