QR densaýlyq saqtaý mınıstri Eljan Birtanov  menıngokok ınfeksıasynyń taraýyna baılanysty Almatyda jýrnalısermen kezdesti. Bul jaıynda Qamshy.kz aqparat agenttigi habarlaıdy. 

Konferensıaǵa QR Densaýlyq saqtaý mınıstri E. Birtanov, Almaty oblysy ákiminiń orynbastary J. Omar, Almaty qalasy ákiminiń orynbasary M. Dáribaev qatysty. 

— Osy ýaqytqa menıngıtke baılanysty 59 adam tirkeldi. Almatyda sońǵy úsh kúnde menıngıtke baılanysty aýrýhanaǵa túskender joq. Premer-mınıstrdiń buıryǵymen Almaty qalasynyń aýrýhanalaryn tekserýge keldik. Kesheli beri Talǵardaǵy aýrýhanaǵa, Esiktegi aýrýhanaǵa, qalalyq balalar ınfeksıalyq aýrýhanasyna, jetinshi qalalyq aýrýhanaǵa baryp, jaǵdaımen tanystyq. Búginde menıngıtke shaldyqqandarmen qatynasta bolǵandardyń sany tórt myńǵa jetti. Olarmen dárigerler tikeleı jumys istep jatyr. Medısınalyq kómekke keler bolsaq, oblystaǵy turǵyndarǵa kórsetiletin kómektiń tómen ekeni jaıly aryzdar kelip tústi. DSM engizgen erejelerdiń buzylýy da bolǵan. Erejege sáıkes, naýqasty bir aýrýhanadan ekinshi aýrýhanaǵa jiberýge  ruqsat joq. Talǵardan Qaskeleńge jiberilgen naýqas qaıtys bolǵan. Soǵan baılanysty tekserýler júrgizildi, - dedi mınıstr.

Birtanovtyń aıtýynsha, turǵyndardyń tirkelgen jerine qaramastan, medısınalyq kómek naýqas jetkizilgen aýrýhanada kórsetilý kerek. Almaty qalalyq densaýlyq saqtaý basqarmasymen osy másele jumaǵa deıin sheshiledi.

Sonymen qatar QR densaýlyq saqtaý mınıstri Eljan Birtanov menıngokok ınfeksıasyna qarsy vaksına baǵasyn arzandatý boıynsha jumystar júrgiziletinin málimdedi.

Aıta keteıik, keshe Taldyqorǵanda 17 jastaǵy stýdent jigit menıngıten kóz jumdy. 

Keshe Astanada menıngokok ınfeksıasyn juqtyrdy degen kúdikpen jansaqtaý bólimine eki jastaǵy bala jetkizildi.

Qazaqstan Respýblıkasy Densaýlyq saqtaý mınıstrligi Qazaqstan turǵyndaryna keńes berdi. 

Aıgerim Taýbaı