«ALTAI»arnasy óziniń alpys jyldyǵyn atap ótti. İs-sharada sala ardagerleri men eńbekkerleri qurmet gramotalarymen jáne mereıtoılyq medaldarmen marapattaldy.

1958 jyly ashylǵan Óskemen telestýdıasy – elimizdegi tuńǵysh aımaqtyq arna. Alpys jyldyq tarıhy ishinde arna jan-jaqty damyp, zaman aǵysynan qalmady, qazirgi kezde arna ýaqyt talabyna saı ónim shyǵarýda. Sońǵy jyldary «Qazaqstan-Óskemen»telearnasy 2017 jylǵy rebrendıngten soń «ALTAI» ataýyna ıe boldy.

– «ALTAI» televıdenıesi óńirdiń sońǵy alpys jyldaǵy mańyzdy oqıǵalaryn saqtap keletin shejire. Búginde arna Elbasynyń mindetterin,memlekettik saıasatty aýqymdy nasıhattap keledi. Jańa maýsymda arnada tyńjobalardyń paıda bolǵany qýantyp otyr. Ásirese, «Rýhanı jańǵyrý» baǵdarlamasy aıasyndaǵy «Rýhty Altaı», «Qazyna», «Latyn dáýiri», «Altaı tulǵalary», «Qasıetti Altaı» syndy jobalarda ataýǵa bolady. Arna kontenti obektıvtilik, jedeldik jáne ózektilik syndy prınsıpterge negizdelgen, – dep atap ótti oblys ákiminiń orynbasary Ásem Núsipova.

Arnany búginde tek óńir turǵyndary ǵana emes, sondaı-aq búkil el turǵyndary súıip tamashalaıdy. Taǵy bir atap óterligi, ujym árdaıym aǵa býynnyń tájirıbesin basshylyqqa alyp, solardan úırenip otyrady, bul – urpaqtar sabaqtastyǵynyń jarqyn úlgisi.

Jas mamandar kásibı turǵyda ósip-órkendep keledi. Efır jetilý ústinde.

Sharaǵa arnaıy kelgen «Qazaqstan» RTRK» AQ basqarma tóraǵasynyń keńesshisi, ardager jýrnalıs Nurtileý Imanǵalıuly Óskemen telestýdıasy habarlaryn Qazaq televıdenıesinen sál erterek tarata bastaǵanyn aıtyp,«Qazaq televıdenıesiniń kindigi – Shyǵysta» dep atady.

Saltanatty jıynda telearnanyń bir top ardagerleri men eńbekkerleri oblys ákiminiń, «Qazaqstan» ulttyq telearnasynyń gramotalarymen jáne alǵys hattarymen, «Qazaq televıdenıesine – 60 jyl» mereıtoılyq medaldarymen marapattaldy.