"Sonda Reseı ánshilerin shaqyrmaý kerek pe?" – dep surady menen Astana qalasy ákiminiń orynbasary Ermek Amanshaev aǵamyz. "Shaqyrýdyń reti bolady, shaqyryńyzdar, biraq memlekettik merekemizde óz ánshilerimiz turǵanda, ózge eldiń ánshilerin lek-legimen aldyryp, alty saǵattyq konsert berý artyq", - dep jaýap berdim.
Endi áńgime qaı jerde, neden bastaldy, ne týraly boldy, soǵan toqtalsam. Áziret Sultan meshitinde Astana ákimi Áset Órentaıulynyń atynan berilgen aýyzashardan shyǵyp turǵan sátimiz edi. Teatr akteri Nurken Óteýil Astana ákiminiń orynbasary Ermek Ámirhanulymen sóılesip kele jatyr eken. Janymyzda aıtysker aqyn Serikzat Dúısenǵazy, aqyn Baýyrjan Qaraǵyzuly, taǵy birneshe jigit turǵan. Áńgimege men de aralasyp, Ermek aǵamyzǵa Astana ákimdiginiń mádenıet baǵytyndaǵy birneshe jumysyna kóńilim tolmaıtynyn, únemi Reseıge eliktep, solardan ánshi shaqyratynyn, olarǵa búdjetten qansha qarjy shyǵyndalatynyn eldiń bilmeıtinin, jalpy Open Air degen ashyq aspan astyndaǵy konsertke Reseı ánshileriniń jyl saıyn sonsha kóp shaqyrylatynyn túsinbeıtinimdi, buǵan qarsy ekenimdi aıtqanymda, ákim orynbasarynyń áńgime basynda keltirilgen «tańǵalǵan jaýabyn» estidim.
Aqparat úshin aıta keteıin, 29 mamyrda Astana ákimdiginiń Mádenıet jáne sport basqarmasynyń muryndyq bolýymen, «Qazaq eli» monýmenti aldynda, Astanamyzdyń 20 jyldyq memlekettik merekesine arnalǵan eń alǵashqy shara - Open Air konserti ótti. Deni Reseı estrada juldyzdary qatysqan konserttiń aty «Uly dala birligi» dep atalypty. Reseıden Dıma Bılan, Iýlıana Karaýlova, Sergeı Lazarev, Anna Sedokova, Natan, Anna Semenovıch, Djıgan, Elena Temnıkova, Tımýr Rodrıgez, Maks Barskıh, Mısha Marvın, «Gradýsy» toby, Artik&Asti jáne basqalary, al óz elimizden Qaırat Nurtas, Aıqyn, Mádına Sádýaqasova, Kámshat Joldybaeva, Álisher Kárimov, Erke Esmahan, Rınat Malsagov, Ringo jáne Ninety One toby óner kórsetti. Bir aqparatta 50 myń, taǵy birinde 100 myń adam jınaldy delingen. Sonsha kóp adam tarttyq, bul asa mańyzdy degen ustanymdary bolsa kerek. Ókinishtisi sol, Reseıden shaqyrylǵan ánshilerge bizdiń kórermen sonsha yntyzar deýge kelmeıdi. Astana qalasy Mádenıet jáne sport basqarmasynyń basshysy Bolat Majaǵulovtyń ózi aıtqandaı, jınalǵandardyń basym bóligi «91» tobyn tyńdaý úshin kelgen. Reseı ánshileri únemi shaqyrylatyn Open Air konsertiniń bıyl tórtinshi márte uıymdastyrylyp otyrǵanyn da aıta ketken jón.
Endi mende suraq: Reseıdiń memlekettik merekesine qazaq elinen qansha ánshi shaqyrylady? Shaqyryla ma ózi? Bizge kelgen (keletin) Reseı ánshilerine qansha qarjy bólindi, qaıdan bólindi jáne kim ruqsat berdi? Dostyǵymyz ben birligimizdi kórsetkisi kelse Reseıden, Ózbekstan, Qyrǵyz eli, basqa da alys-jaqyn elderden nege bir-birden ánshi shaqyrylmaıdy? Nelikten biz únemi Reseıden shaqyramyz? Nege biz rýhanıatymyzǵa qatysy joq osyndaı sharalarǵa Rýhanı jańǵyrýdyń belgisin qoıyp qoıamyz?
Aıtpaqshy, Ermek Amanshaevpen bolǵan qysqa áńgime barysynda, biz óz ónerimizdi túgendep otyrmyz, sondyqtan Reseıden shaqyrǵannyń da aıyby joq degen pikir aıtyldy. Kelispeımin. Shetten kelgender memlekettiń qoldaýymen qymbat, záýlim saraılarda óner kórsetip jatqanda, bizdiń «Shanshar», «Aldaraspan» sıaqty óner ujymdary óz esebinen jartylaı qarańǵy, konsert ótkizýge arnalmaǵan jerlerde halyq jınaýǵa májbúr. «Óner qyrandary» sıaqty qoldaýshysy joq teatrlardyń jaıy aıtpasa da túsinikti. Osy jerde oqyrmandarǵa suraǵym: Astananyń 20 jyldyǵynda qandaı ánshilerdi, teatrlardy, basqa da óner ujymdaryn qoldaý kerek dep sanaısyz? Múmkin bul usynysymyzdy Astana ákimdigi qabyl alar?
Jyǵylǵanǵa judyryq demekshi, Astana kúnine oraı Reseı komandalarynyń qatysýymen KVN-nen Eýrazıa kýbogy ótetin bolypty. Jarnamasyn qatelesip «kýbogİ» dep jazyp qoıǵan. Oıynǵa Reseıden alty, bizden eki top qatysady. Al, óz jastarymyzǵa jaqyn «Jaıdarman» oıynshylary Astana kúninde bar ma eken ózi?
Mádı Manatbek
