Búgin búkil TMD elderi úshin erekshe kún bolyp sanalady. Sebebi osydan 73 jyl buryn adamzat tarıhyndaǵy eń aýyr qantógis soǵys aıaqtalyp, 9 mamyr kúni kóptegen memleketterde Jeńis merekesi kúni bolyp belgilenip, keń kólemde toılana bastady. Qazir Qazaqstannyń ár túkpirinde qýanyshqa toly bul meıramdy joǵary dárejede atap ótý úshin kóptegen áskerı paradtar jáne de «Máńgilik polk» aqsıasy sıaqty birqatar is-sharalar tolassyz ótkizilýde.
Semeı shaharynda da Jeńis merekesine arnalǵan merekelik sharalar kóptep uıymdastyrylýda. Tańerteń erte qala ákimi Ermak Sálimov pen bir top áskerı salada abyroıly qyzmet atqaryp júrgen azamattar men elimizdi qorǵaıtyn bolashaq sarbazdar arnaıy Jeńis saıabaǵynda ornalasqan «Máńgilik alaýǵa» gúl shoqtaryn qoıyp, soǵysta qaza tapqan barlyq ardagerlerdi bir mınýt únsizdikpen eske aldy.
Shyny kerek saıabaqqa jınalǵan qala halqynyń qarasy kóp boldy. Maıdanǵa qatysqan maıdangerlerimizde otty jyldardaǵy estelikterimen bólisip, jastardy eshbir qıyndyqtarǵa moıymaı, tóze bilýge, qyraǵy bolýǵa shaqyrdy.
Merekeni qarsy alýǵa kelgen barsha shahar turǵyndaryna qalalyq Dostyq úıiniń «Aısha –bıbi» ulttyq-mádenı ortalyǵynyń aq jaýlyqty ájeleri men qalamyzdaǵy ózge de ónerpazdar soǵys jyldaryndaǵy ánderdi shyrqady.
