9 mamyr kúni tańerteń ádettegideı Óskemendegi Ózen vokzalynyń mańyna qala turǵandary jınala bastady. Sońǵy birneshe jyl kóleminde Ertis jaǵalaýymen sherý tartyp, atalarynyń sýretterin kóterip shyǵýdy ádetke aınaldyrǵan qalalyqtar bıyl da «Máńgilik polk» dep atalatyn jıynǵa keldi. Orysshasy «Bessmertnyı polk» bolǵan soń biz ony «Máńgilik polk» dep qazaqshaladyq, alaıda, kósheniń kóldeneńine biraq jetetin uzyn plakatta bul «Dańq polki» dep jazylypty. Qandaı polk bolsa bul aksıanyń ekinshi dúnıejúzilik soǵysta sheıit bolǵan bozdaqtardy eske alýǵa baǵyttalǵany belgili. Eń bastysy bul aksıa sońǵy jyldary buqaralyq sıpat alyp, sherýge eńkeıgen qarıadan eńbektegen balaǵa deıin qatysatyn bolyp júr.
Uıymdastyrýshylardyń aıtýynsha, bıylǵy sherýge de 10 myńnan astam adam jınalǵan. Tańerteńgi saǵat 10-00 shamasynda Ózen vokzalynan qozǵalǵan qalyń jurt Ertis jaǵalaýymen Dańq memorıalyna qaraı bet túzedi.
Kolonnanyń basynda SHQO mádenıet basqarmasynyń úrlemeli aspaptar ansambli saltanatty áskerı áýender oınap, aksıaǵa erekshe kóńil-kúı berip kele jatty. Sonymen qatar oblystyq İİD, TJD sıaqty memlekettik qurylymdar men ákimdik qyzmetkerleri de sherýde sap túzedi.
Qala turǵyndarymen birge merekelik sharaǵa oblys ákiminiń birinshi orynbasary Erlan Aımuqashev, oblys ákiminiń orynbasary Ásem Núsipova, qala ákimi Qýat Tumabaev bastaǵan oblys jáne qala basshylyǵynyń ókilderi de aldyńǵy qatardan kórindi.Oblystyq meshittiń bas ımamy Ermek qajy Tasbolatuly men Óskemen qalasynyń epıskopy Amfılohıı sherý sapynda boldy.
Óskemendikter Slavskıı jaǵalaýynyń boıymen qozǵaldy, jol boıy sherýshiler sany tolyǵyp, kóbeıe tústi. Sýret kótergen halyqtyń basy Strelkaǵa jetkende aıaǵy Ózen vokzalynan endi ǵana jyljyǵan bolatyn.
Óskemen qalasynyń turǵyny Azamat Ydyryshev óziniń atasy Ahat Ydyryshevtyń erligi týraly aıtyp berdi. Atasy 1941-1945 jyldar aralyǵynda soǵysqa bastan aıaq qatysqan eken.
-Atam Berlınge deıin baryp, búkil Eýropany jaıaý sharlap qaıtypty. Onyń erligin biz januıamyzben maqtan tutamyz. Jyl saıyn atamyzdyń sýretin kóterip osy sherýge qatysatyn bolyp júrmiz. Ulymnyń da esimi Ahat. Mine onyń keýdesindegi medaldar sol atamyzdan qalǵan. Endi úlken atasynyń medaldaryn kishkentaı Ahat taǵyp júr,-dep Azamat óz ulynyń keýdesindegi medaldardy kórsetti.
