Baskól aýylynda maıdangerlerge arnalyp memorıaldyq eskertkish ornatyldy. Bıiktigi 7 metrdi, eni 10 metrdi quraıtyn monýmenttiń qurylysyna jarty mıllıondaı qarajat jumsalǵan eken. Igilikti sharaǵa soǵys jáne tyl ardagerleri, sondaı-aq, Semeı, Almaty men Astana qalalarynan kelgen meımandar jáne jergilikti bılik ókilderi jınaldy.
Memorıaldy eskertkishke mármardan jasalǵan taqta ornatylyp, oǵan jergilikti maıdangerlerdiń esimi jazylypty. Al onyń aldyna tizerlep turǵan jaýyngerdiń músini qoıylǵan. Bul otty jyldary antyna berik, rýhy qaısar jannyń beınesi bolsa kerek. Osy rette adamzat tarıhyndaǵy alapat soǵysqa Baskól jáne Qaraqudyq aýyldarynan 300 azamat attanǵanyn aıta ketken oryndy. Solardyń arasynan 84 sarbazǵa Otanyna oralý buıyrmaǵan eken. Qalǵan 216 jaýynger de búgin arada joq. Áıtse de, yntymaǵy jarasqan qaraǵaıly óńirdiń halqy jerlesterin umytqan emes. Buǵan 300 erdiń esimi túgeldeı jazylǵan eskertkish monýmenti dálel.
Baskóldikterdiń qan maıdandaǵy erligin jańǵyrtý maqsatynda, «Ákeler rýhyna taǵzym» kitabynyń tanystyrylymy ótkizildi. Bul eńbekti osy óńirdiń týmalary Rýslan Nasyrov pen Lúsıa Hamıtova jazyp shyqqan. Ázirge atalmysh týyndy sanaýly danamen basylypty. Aldaǵy ýaqytta oǵan tolyqtyrýlar engizilip, kólemin ulǵaıtý qarastyrylyp otyr.
-Soǵysqa bizdiń aýylymyzdan kóptegen azamattar ketti. Onyń zardabyn ár otbasyǵa tıdi desem qatelespeıtinim anyq. Qanshasy urys alańynan oralmady. Meniń ákem Adyhan Baıkanov pen onyń inisi Ahtan Baıkanov maıdan dalasynda qaza tapty. Tek biri inisi Qadyr Baıkanov qaıtyp keldi. Baskól orta mektebinde soǵys ardagerlerine arnalǵan mýzeı jumys isteıdi. Bul qýantyp otyr. Óıtkeni jas urpaq jeńimpaz atalaryn bilip ósse jaman bolmaıdy. Kerisinshe Otanyna adal azamattar bolyp tárbıelenedi degen oıdamyn. Eskertkish tıanaqty jasalǵan eken. Osyǵan biz alǵys aıtamyz, — dedi tyl ardageri Marvatjan Baıkanov.
Bıyl elordanyń 20 jyldyq mereıtoıy atalyp ótiletini málim. Torqaly dataǵa oraı, qazynaly qarıalar men alys-jaqynnan kelgen qonaqtar, eskertkishtiń mańyna 20 túp jas shyrsha aǵashtaryn otyrǵyzdy.
