Óskemende dzúdodan KSRO-nyń sport sheberi Talǵat Aqtaevty eske alýǵa arnalǵan ashyq el birinshiligi ótip, oǵan 23 jasqa deıingi 300-ge jýyq sportshy qatysty.

Birinshilikte qazaqstandyq dzúdoshylarmen qatar, Reseı men Qyrǵyzstannan kelgen tatamı sheberleri de óner kórsetti. Eki kúnge sozylǵan báseke qortytyndysy boıynsha shyǵysqazaqstandyq sportshylar qorjynǵa jeti júlde saldy. Atap aıtsaq, Ǵabıt Dáýletbaev 81 kelige deıingi salmaq dárejesinde jáne Jasulan Muhamethanov (100 kelige deıin) barlyq qarsylasyn tize búktirip, jarys jeńimpazdary atansa, 48 kelige deıingi salmaqta óner kórsetken Aıdana Buǵylbaeva men Evgenıı Kıashkoǵa (100 keli deıingi salmaq) kúmis medaldar buıyrdy. Qola júldege Dáýren Dýlatov (81 kelige deıin), Almas Akrashev (90 kelige deıin) pen Aıan Ramazanov (100 kelige deıin) ıelik etti.

– Bul dodaǵa tyńǵylyqty daıyndaldym. Qarsylastarymnyń bári myqty boldy. Alaıda degenime jettim. Barlyq jetistigim jaqyndarymnyń, bapkerlerim Dýman Bulǵynbaev pen Baqytbek Dýanovtyń arqasy, – dedi jarys jeńimpazdarynyń biri, Óskemendegi Dzúdo ortalyǵynyń tárbılenýshisi Ǵabıt Dáýletbaev.

Aıta keteıik, Ǵabıt osyǵan deıin birneshe respýblıkalyq jáne halyqaralyq jarystyń júldegeri atanyp úlgergen. Ol, sonymen qatar dzúdodan elimizdiń sport sheberi ataǵyna da ıe.

Al jarys qorytyndylaryna keler bolsaq, jalpykomandalyq esepte Almaty oblysynyń quramasy top jarsa, ekinshi orynǵa atyraýlyq dzúdoshylar ıe boldy. Bizdiń jerlester, Shyǵys Qazaqstan oblysynyń quramasy úzdik úshtikti túıindedi.