Qytaıda esirtki kontrabandasy úshin sottalǵan qazaqstandyq Aqjarqyn Turlybaı qytaılarǵa aǵylshyn tilin úıretip júr, dep habarlaıdy Sputnik Qazaqstan. 

Qazaqstannyń Qytaıdaǵy elshiliginiń qyzmetkeri 22 mamyrda Turlybaımen kezdesip qaıtty. Aıtýynsha, otandasymyzdyń densaýlyǵyna, túrmeniń tamaǵy men turý sharttaryna eshqandaı shaǵymy joq.

Qazaqstan syrtqy ister mınıstrliginiń habarlamasynda kórsetilgendeı, Aqjarqyn ózin jaqsy sezinedi. Túrmede otyrǵan ýaqytynda qytaı tilin jaqsy meńgerip aldy, qazir qytaılarǵa aǵylshyn tilin úıretip júr eken. Dene shynyqtyrýmen aınalysady. Elshiliktiń konsýldyq qyzmetkerleri onymen únemi baılanysta, qajetti kómek kórsetip jatyr. Qalaǵan kezde kitaptar aparyp, jeke qoldanýǵa qajetti zattardy satyp alý úshin mekemeniń esepshotyna aqsha aýdarady.

Aıta keteıik, Aqjarqyn Turlybaı 2014 jyldyń naýryzynda esirtki tasymaldady degen kúdikpen Gýanchjoý qalasynyń áýejaıynda ustalǵan bolatyn. Ol kezde otandasymyz 20 jasta boldy. 2015 jyldyń maýsymynda Qytaı soty ony ómir boıyna bas bostandyǵynan aıyrdy. Sotta Aqjarqyn sheteldik dosy aldap ketkenin aıtyp, kinásin moıyndaǵan joq. 

Keıin apelásıalyq ınstansıa soty ómir boıyna bas bostandyǵynan aıyrý týraly úkimdi joıdy.

2016 jyldyń qarashasynda Turlybaıdyń isi boıynsha apelásıalyq tyńdaý ótti. 

Aqjarqyn Turlybaıdyń apelásıalyq alqa sheshimin kútip júrgenine bir jarym jyl boldy.