Qyrǵyzstan prezıdenti Sooronbaı Jeenbekov 6 maýsymda memlekettik saparmen Qytaıǵa bardy. Sapar barysynda ol Qytaı tóraǵasy Sı Szınpınmen kezdespek.

Qyrǵyzstan prezıdenti baspasóz qyzmetiniń aqparaty boıynsha, Jeenbekov sapary aıasynda Qytaı memlekettik keńesiniń premeri Lı Kesánmen jáne Búkilqytaılyq halyq ókilderi jıyny turaqty komıtetiniń tóraǵasy Lı Chjanchýmen kezdesedi. Kelissózde Qyrǵyzstan-Qytaı qatynasy men yntymaqtastyǵynyń aspektileri talqylanady dep boljanyp otyr.

Sooronbaı Jeenbekov Qytaıǵa Qyrǵyzstanda Pekınmen Qytaıǵa gaz qubyryn tartý týraly kelisim jasasý, Bishkek jylý-elektr stansıasyn modernızasıalaýǵa bólingen qarjynyń tıimdi jumsalýy jáne Qytaı dıplomatıalyq ókildigine jer telimin berýge qatysty talqy qyzǵan shaqta baryp otyr.

Qyrǵyzstan prezıdenti sapary barysynda Shanhaı yntymaqtastyq uıymy (SHYU) elderi basshylarynyń 9-10 maýsymda Sındao qalasynda ótetin samıtine qatysady. Samıtte SHYU-ny odan ary damytý máselesi talqylanbaq.

Jeenbekov SHYU samıti aıasynda Tájikstan prezıdenti Emomalı Rahmonmen, Úndistan premer-mınıstri Narendra Modımen jáne Mońǵolıa prezıdenti Haltmaagıın Battýlgamen kelissóz ótkizbek.

SHYU quramynda Qazaqstan, Qyrǵyzstan, Qytaı, Pákistan, Reseı, Tájikstan, Úndistan jáne Ózbekstan bar. Osy aptada samıtke qatysýǵa Qazaqstan prezıdenti Nursultan Nazarbaev ta Qytaıǵa barady.

Samıt qorytyndysynda Qytaı SHYU-ǵa 2018-2019 jyldary tóraǵalyq jasaý mindetin Qyrǵyzstanǵa tapsyrady.