QHR tóraǵasy Shı jın pıń Qazaqstan prezıdenti Nursultan Nazarbaevqa alǵysyn bildirdi, dep habarlaıdy Qamshy.kz aqparat agenttigi.

«Biz adamzattyń ortaq taǵdyryn qalyptastyryp, jarqyn bolashaqqa jeteleý jolynda Qazaqstanmen birge júrýge daıynbyz. Men qazaq-qytaı dostyq kemesin sizben birge júrgizýge daıynmyn», - dedi Shı jın pıń.

Óz kezeginde memleket basshysy Qytaı tóraǵasyna alǵysyn bildirdi.

«Men Qytaıǵa kelerde sizben kezdesetinime ishteı tolqyp turamyn. Sizdiń maǵan degen ystyq yqylasyńyz ben senimińiz kóńilimdi qýantady. Osy memlekettik saparǵa shaqyrtý jibergenińiz úshin sizge alǵysym zor. Ádettegideı meni zor saltanatpen qabyldadyńyz. Osy múmkindikti paıdalana otyryp, sizdi joǵary memlekettik laýazymǵa qaıta saılanýyńyzben jáne álem tarıhynda eleýli orynǵa ıe Qytaı kompartıasynyń 19 sezin sátti ótkizýińizben shyn júrekten, dostyq kóńilmen quttyqtaǵym keledi», - dedi Nursultan Nazarbaev.

Aıta keteıik, Beıjińge barǵan Nazarbaevty saltanatty túrde qabyldady. Beıjińdegi Halyq jınalysy úıiniń aldynda sap túzegen áskerıler Qazaqstannyń Memlekettik ánuranyn orkestrmen oryndap, Nursultan Nazarbaevqa zor qurmet kórsetti.

Bul – eki el basshysynyń 18-shi ret júzdesýi. 

Sapar barysynda Qytaı Halyq Respýblıkasynyń Tóraǵasy Shı jın pıńmen, Qytaı Halyq Respýblıkasy Memlekettik keńesiniń Premeri Lı Kesánmen, Qytaı Halyq Respýblıkasy Búkilqytaılyq halyq ókilderiniń jınalysynyń Turaqty komıtetiniń Tóraǵasy Lı Chjanshýmen joǵary deńgeıdegi kezdesýler ótkizý, sondaı-aq Qazaqstan men Qytaıdyń isker toptar ókilderimen júzdesý jáne birqatar eki jaqty qujattarǵa birlese qol qoıý josparlanyp otyr.