Qazaqstandaǵy halyqtyń 40%-y – «az qamtylǵandar». Olardyń tabysy 2025 jylǵa qaraı 22,8%-dan 27%-ǵa deıin arttyrylady. Qazaqstan Ulttyq ekonomıka mınıstri Tımýr Súleımenov bul týraly sheteldik ınvestorlar keńesiniń 31-otyrysynda málimdedi, dep habarlaıdy Qamshy.kz aqparat agenttigi QR Ulttyq ekonomıka mınıstrliginiń baspasóz qyzmetine silteme jasap.

Qazaqstannyń 2025 jylǵa deıingi Strategıalyq damý josparynyń aıasyndaǵy eldegi josparlardyń qatarynda halyqtyń jan basyna shaqqandaǵy JİÓ ósimin 46,1 myń dollarǵa deıin, eńbek ónimdiligin jylyna ortasha eseppen 4,7%-ǵa jetkizý mindeti tur. 

«Sizdiń bizdiń aldymyzǵa qoıyp otyrǵan eldiń áleýetin kóterý mindeti halyqtyń ómir súrý sapasynyń artýymen qatar júrýi qajettigin jaqsy túsinemiz», - dedi T.Súleımenov Memleket basshysyna qarata.

Bul úshin, Qazaqstan UEM basshysynyń aıtýynsha, halyqtyń ómir súrý jasynyń uzaqtyǵyn 72 jastan 75-ke deıin kóterý, az qamtylǵan 40% halyqtyń tabysyn jalpy tabys kóleminiń 22,8%-ynan 27%-ǵa deıin arttyrý, orta bilim berý sapasyn PISA testin (Oqýshylardyń bilimdegi jetistigin baǵalaýdyń halyqaralyq baǵdarlamasy) qoldaný arqyly jaqsartý qajet. 

«Qoıylǵan mindetterge qol jetkizýdiń negizi 2050 Strategıasyn júzege asyrýdaǵy 7 júıelik ózgerister men 7 basym saıasattyń úılesimdiligi», - dedi mınıstr.

Máselen, strategıany júzege asyrý saıasatynyń biri «Joǵary ómir súrý sapasyn qamtamasyz etý saıasaty».

«Ol halyqtyń áleýmettik jáne turǵyn úı standarttaryn kezeńdik jaqsartýǵa baǵyttalǵan. Bul jerde biz sizdiń 5 áleýmettik bastamańyzdy tolyqtaı júzege asyrýǵa tıispiz», - dedi Qazaqstan UEM basshysy.

Mınıstr sondaı-aq elimizdiń aldynda jeti júıelik ózgeristerdiń aıasynda barlyq kadr daıarlaý júıesin qaıta baǵdarlaý máselesin sheshý; tehnologıalyq jańartýdy iske asyrý; jeke salany jandandyrý; álem elderimen yntymaqtastyqta qolaıly saýda rejımin qalyptastyrý; sybaılas jemqorlyqty joıý; óńirlerdiń ekonomıkalyq derbestigin arttyrýdyń esebinen damytý jáne t.b. mindetter turǵandyǵyn eske saldy.