Qazaqstan prezıdenti Nursultan Nazarbaev úsh kúnge jalǵasqan Qytaıǵa saparyn qorytyndylap, jýrnalısermen brıfıń ótkizdi, dep habarlaıdy Qamshy.kz aqparat agenttiginiń tilshisi.
Brıfıń barysynda Elbasy sapardyń mańyzy men ondaǵy talqylanǵan máselelerge toqtalyp ótti. Bıylǵy jyly AQSH-tan bastap, Reseıge jalǵasqan saparlarynyń qorytyndysyn aıta ketip, Qytaıǵa saparynyń sátti aıaqtalǵanyn málimdedi.
– Bıylǵy jyldyń jartysy aıaqtalyp kelel3. Birneshe sapar boldy. Alǵashqysy qańtardaǵy AQSH-qa sapar. Ol este qalatyn eleýli másele. İri kásipkerlermen kezdesip, eki eldiń arasynda 9 mlrd-qa jýyq qarajatqa qol qoıyldy. İle-shala solardyń kásipkerleri Qazaqstanǵa kelip, bizdiń is jalǵasyn tapty. Keıin Reseı prezıdentimen kezdestik. Eki arada birneshe másele, ásirese Baıqońyrdaǵy Qazaqstannyń qatynasýy sóz boldy. Baıqońyrdyń bir bóliginde "Báıterek" degen baǵdarlamany júzege asyryp, 2022 jyldan bastap tıisti zymyran iske qosylady. Qazaqstanda jer serigin jasaıtyn zaýyt salynyp jatyr. Onyń ústine Reseıdiń basyna túsken qıynshylyqtarǵa baılanysty batystyń kóp kompanıasy Qazaqstan arqyly jumys isteýden úmitti, bul biz úshin asa tıimdi, - dedi Nazarbaev.
Sonymen qatar Qytaımen aradaǵy qarym-qatynastyń mańyzdylyǵyna toqtalyp ótti.
– Osy joly Qytaıǵa keldik. Táýelsizdik alǵanǵa deıin eki el arasynda eshqandaı qarym-qatynas bolǵan joq. Kerisinshe Sovet odaǵy men Qytaı arasy shıelenisip turdy. Eki aradaǵy shekarada, ásirese Jalańashkólde birneshe adam óldi. Sońǵy 20 jyldyń ishinde eki eldiń arasyndaǵy qarym qatynas edáýir jaqsardy. Shekara jónindegi kelisimge qol qoıyldy. Shekarada 6 eldiń basshylary kezdesip, Shanhaı uıymyn qurý týraly kelisimge keldi. Keıin ekonomıkalyq baılanys jóninde sóz qozǵap, SHYU quryldy. Ideıany alǵa tartýshylardyń biri Qazaqstan boldy. Munyózderi biledi, qashan da aıtyp otyrady, - deı kele Elbasy samıttiń nátıjeli qorytyndysyn atap ótti.
– Qytaı tóraǵasynyń shaqyrýymen kelgen resmı sapar óte nátıjeli boldy. Tarıhı XIX partıanyń sezi ótti. Úlken máseleler talqylandy. 2049 jyly QHR-dyń táýelsizdik alǵanyna 100 jyl tolady. Sol jyly bizdiń "Qazaqstan - 2050" strategıamyz sekildi Qytaı da damyǵan eń aldyńǵy qatardaǵy memleketterdiń tiziminen kórinýdi kózdep otyr. Ekinshiden, buryn Qytaı arzan taýarlardy shetke shyǵaratyn el bolyp sanalsa, qazir naǵyz tehnologıalyq ári búgingi zamanǵa saı ǵylymı taýarlardy eksporttamaq. Qazirdiń ózinde Qytaıdy AQSH-tan keıingi ekonomıkasy damyǵan el retinde tanımyz. Qytaıdyń búgingi tehnologıasy Batystan artyq bolmasa, kem emes. Biz úshin de qolaıly. Buryndary men ındýstrıalyq baǵdarlamalardy oryndaý úshin qondyrǵy kerek, zaýyttar kerek ekenin aıtqanmyn, soǵan baılanysty biz 28 mlrd dollar kólemindegi 51 obektige qol qoıǵan edik. Qazir jańa 40 obektige qol qoıyldy, - dedi Elbasy óz sózinde.
