AQSH prezıdenti Donald Tramp Kanadada ótken "Úlken segizdik" samıtiniń qorytyndy komúnıkesine qol qoımaý týraly AQSH ókilderine tapsyrma bergen. Tramptyń Twitter áleýmettik jelisindegi jazbasyna qaraǵanda, mundaı sheshimdi ol samıt qorytyndysy boıynsha ótken baspasóz máslıhatynda Kanada premer-mınıstri Djastın Trúdonyń AQSH-tyń halyqaralyq saýda máselelerine qatysty ustanymyn, sonyń ishinde metal ónimderine baj salyǵyn engizýin taǵy da synaǵan soń qabyldaǵan.
Trúdonyń málimdemesin "ádiletsiz" dep ataǵan Tramp, AQSH álgindeı sharany Kanada men basqa elderde amerıkalyq taýarǵa shekteý qoıylǵandyqtan solarǵa jaýap retinde qabyldaǵanyn aıtqan.
G7 samıtinde AQSH pen seriktes elder arasynda halyqaralyq saýda máselelerinen bólek ǵalamdyq klımatqa qatysty da kelispeýshilik bolǵan. Samıtke qatysýshylar Tramptyń "Úlken jetilik" qataryna Reseıdi qaıta qosý týraly ıdeıasyn da qoldamaǵan.
Buǵan deıin Kanada premeri Trúdo "Úlken jetilik" elderi – AQSH, Kanada, Fransıa, Germanıa, Italıa, Ulybrıtanıa men Japonıa samıttiń qorytyndy komúnıkesine qatysty kelisimge kelgeni týraly málimdegen. Qujatta barlyq elderdiń biryńǵaı erejege súıenetin erkin saýdaǵa beıil ekendigi aıtylǵan.
Alaıda prezıdent Tramp samıttiń aıaqtalýyn kútpesten ketip qalǵan. Muny ol maýsymnyń 12-inde Sıngapýrde ótedi dep josparlanǵan Soltústik Koreıa lıderi Kım Chen Ynmen kezdesýine daıyndalý qajettigimen túsindirgen.
