Álemniń barsha musylmany maýsymnyń 11-inen 12-sine qaraǵan túni uıyqtamaı, Jaratýshyǵa syıynýmen ótkizedi. Qadir túni nemese Laılatýl-kadr jyl saıyn qasıetti Ramazan aıynda bolady.

Qadyr túni — qasıetti tún. Oraza (Ramazan) aıynyń sońǵy on kúniniń birinde bolady. Bul tún týraly Quran Kárimniń “Qadyr súresinde” aıtylǵan. Bes aıattan turatyn súrede Qurannyń Qadir túninde túsirilgendigi, onyń myń aıdan qaıyrly ekendigi, bul túnde Jábireıil perishte Alla ámirimen jer betine túsip, adamdarǵa qyzmet etetindigi jáne tańǵa deıin tynyshtyq bolatyndyǵy aıtylady.

Qadir túni perishteler musylmandarǵa duǵa oqyp, tileýles bolady. Jasalǵan ǵıbadattyń myń aıǵa, ıaǵnı seksen úsh jylǵa teń bolatyndyǵyna baılanysty musylmandar Qadir túnin qulshylyqpen ótkizýge tyrysady.

Ádette, Láılátýl-kadr túni qaza etilgen namazdar oqylyp, Qasıetti Quran kitaby oqylady, ótken kún men aılardyń qatelikteri saralanady, ókpe-renish keshirilip, keleshekke jospar qurylady. Qasıetti Qadir túni oqylǵan namaz myń aı nemese 83 jyl oqyǵan namazben teń.

Meshit ımamdarynyń keńesine súıensek, bul kúni tús kezinde eptep kóz shyrymyn alyp, aýyzashar kezinde toıyp tamaq ishpegen jón. Qasıetti túni duǵalardyń qysqa tizimin ázirlegen jón. 

Budan bólek, birneshe shekteýlerdi saqtaý qajet. İshimdik ishýden bas tartyp, Qadir túnin oıyn-saýyq oryndarynda emes, úıde nemese meshitte ótkizgen abzal. Ósek aıtyp, ǵaıbat sóıleýge, urysýǵa bolmaıdy. Kóńil kóteretin fılmder men baǵdarlamalar kórmeı, tynyshtyqta otyryp, mańyzdy jaıttardy oılaný kerek.