Búgin Elbasy Nursultan Nazarbaev Chıńdaý qalasynda Qytaı saparyn qorytyndylap, jýrnalısermen suhbattasty.
Negizgi taqyryp – Memleket basshysynyń Qytaı tóraǵasy Shı Jın Pıńmen Pekınde kezdesýi jáne Chıńdaý qalasynda ótken SHYU jınalysy tóńireginde boldy. Nursultan Ábishuly osy sapar barysynda birneshe jobalarǵa qol qoıylyp, mıllıardtaǵan sýmmanyń kelisimderi jasalǵanyn atap ótti.
Prezıdenttik pýl qatarynda bolǵan "Qamshy" aqparat agenttiginiń jetekshisi Bilál Qýanysh Elbasyǵa eki suraq qoıdy.
- Aldaǵy ýaqytta osy jobalardy tıanaqty, turaqty júzege asyrý úshin eki el úkimeti arasynda, halyqtary arasynda qandaı jańa qadamdar jasalady? Yntymaqtastyqty odan ári damytýǵa qandaı maqsat-mindetter qoıylady?, - dep surady Bilál Qýanysh.
- Bul jobalardyń baıandy damýy úshin tıisti mınıstrlikter jumys isteýi kerek. Búgin aıtylǵan bastamalardyń barlyǵyn qadaǵalap otyratyn "Qazaq INVEST" degen komıtet qurdyq. Mysaly Amerıkada bıznestiń kapıtandarymen kezdestik. Olar kóp jerlerge barady, biraq tıimdi kezdesýler ótkize almaı jatady. "Qazaq INVEST" osyndaı jaǵdaılardy baqylaýda ustaıdy. Men ózim de nazarda ustaımyn. Prezıdent apparaty da barlyq jumystardy qadaǵalap otyrady. Ár mınıstrlikke ózderine tıesili mindetterdi júkteımiz. Ásirese Qytaıda qadaǵalaý óte myqty. Shekaradaǵy kemshilikterdi de aıtyp eskertedi. Sheteldik kompanıalar jol salyp jatyr. Olardyń jumystaryn qadaǵalap otyratyn Dúnıejúzilik, Eýropalyq, Azıalyq jáne Arab bankteri bar. Osy bankter qansha qarajattyń ıgerilgenin, qaıda jumsalǵanyn jiti baqylýda ustaıdy, - dedi Elbasy Nursultan Nazarbaev. 
- Shı Jın pıń myrza búgingi kezdesýde Abaıdyń Otyz jetinshi qara sózinen úzindi oqydy. Abaıǵa degen qurmet qazaq halqyna degen qurmet bolyp sanalady. Eki memleket arasyndaǵy ekonomıkalyq qarym-qatynastyń damyǵany sıaqty aldaǵy ýaqytta qytaı jurty men qazaq halqy arasynda ádebıet pen mádenıettiń damýyna qatysty kózqarasyńyzdy bilgim keledi...
-Árıne, Shı Jın pıń myrzanyń: "Dúnıe - úlken kól, zaman - soqqan jel, aldyńǵy tolqyn - aǵalar, artqy tolqyn - iniler, kezekpenen óliner, baıaǵydaı kóriner", - dep Abaıdyń Otyz jetinshi qara sózin qytaısha aıtyp otyrǵany biz úshin janymyzǵa jaǵady. Bul Abaı babamyzdyń halyqaralyq qatynastarǵa da óziniń áserin tıgizip otyrǵanyn kórsetedi. Abaıdy bilý - bizdiń halqymyzdy bilý degen sóz. Men de bul kisilermen sóılesken kezde Konfýsııdyń sózderin mysalǵa keltirip otyramyn. Konfýsııdyń aýyly, týǵan jeri dál qazir biz turǵan jerden 100 shaqyrym jerde ǵana eken. Dıplomatıalyq jaǵdaılarda bir-birimizge jaqsy sóz aıtý úshin uly adamdardyń sózin tilge tıek etip otyramyz. Osy saparda "Kompozıtor" degen kınofılm túsirip alyp keldik. Bul fılm Qytaıdyń uly kompozıtory Sı Sınhaıǵa arnalǵan. Fılmniń arnaıy kórsetilimine kınoda oınaǵan ártister men rejıserler keldi. Bundaı sharalar eki eldiń arasyn jaqyndatady. Shynyn aıtqanda tarıh úshin 100 jyl, 200 jyl degen kóp ýaqyt emes. XVIII-XIX ǵasyrlarda soǵys ta boldy. Al Qazaqstan arqyly ótetin "Jibek joly" Qytaı men Eýropany jalǵap, sol arqyly qarym-qatynasymyz ǵasyrlar boıy jalǵasyp keledi. Qazir 14 myń qazaqstandyq jas Qytaıda oqyp jatyr. Elshiliktiń málimeti boıynsha odanda kóp bolýy múmkin. Men keshe bir top jastarmen kezdestim. Qytaı tilin oqýǵa olardyń yntasy zor. Bolashaqta Qazaqstanda jumys jasaıtyn Qytaı kompanıalarynda qyzmet etýi úshin ózimizdiń mamandar qajet. Olar da eki el arasyndaǵy yntymaqtastyqty arttyrady. Shı Jın pıń myrzanyń Abaıdyń sózin aıtqany saǵan unap ketti, ıá, endeshe uly babamyzdyń basqa da sózderin de esterine salyp otyraıyq, - dep ázildep túıindedi óz sózin Memleket basshysy.
Foto avtory: Baýyrjan Jýasbaev
