Qazaqstan Prezıdenti Nursultan Nazarbaev Monǵolıa Prezıdenti Haltmaagıın Battýlgamen kezdesti, dep habarlaıdy Qamshy.kz aqparat agenttigi.

Memleket basshysy Qazaqstan halqynyń jáne jeke óziniń atynan Haltmaagıın Battýlgany prezıdenttik saılaýdaǵy jeńisimen quttyqtap, Qazaqstannyń barlyq baǵyt boıynsha yntymaqtastyqty damytýǵa daıyn ekenin aıtty.

–  Bıyl Qazaqstan Respýblıkasy men Monǵolıa arasyndaǵy dostyq qarym-qatynastar men yntymaqtastyq jónindegi shartqa qol qoıylǵanyna 25 jyl tolady. Bul qujat kóp ǵasyrlyq dostyq jáne tatý kórshilik dástúri bar elderimiz arasyndaǵy yntymaqtastyqty dáıekti damytý jolynda mańyzdy ról atqarady, – dedi Qazaqstan Prezıdenti.

Haltmaagıın Battýlga óziniń Monǵolıa Prezıdenti bolyp saılanýymen jáne týǵan kúnimen quttyqtaǵany úshin Nursultan Nazarbaevqa rızashylyq bildirdi.

– Men Sizdiń jumysyńyzdy muqıat baqylap otyramyn jáne jańa elorda – Astana qalasyn salǵanyńyzdy bilemin. Men Monǵolıanyń qurylys mınıstri bolǵan kezde de Qazaqstan tájirıbesin kóp zerttedim. Biz de elimizdiń astanasy – Ulan-Bator qalasynyń tóńireginde Maıtar qalasyn salý múmkindigin qarastyryp jatyrmyz, – dedi Monǵolıa Prezıdenti. 

Sońynda Memleket basshysy, eń aldymen, eki el arasyndaǵy yntymaqtastyqty jańa deńgeıge kóterý qajettigine toqtalyp, Monǵolıanyń Shanhaı yntymaqtastyq uıymynyń jumysyna atsalysýǵa degen umtylysyn Qazaqstannyń qoldaıtynyn aıtty.