AQSH prezıdenti Donald Tramp «Úlken jetilik» samıtindegi jelide taralǵan sýretke qatysty pikir bildirdi.

Álem boıynsha qyzý talqylanǵan sýrette ústelde otyrǵan Trampqa Germanıa kansleri Angela Merkel tesile qarap tur. Merkeldiń janynda ózge de Eýropa basshylary jınalǵan. Basshylardyń kózqarasy, Tramtyń jalǵyz otyrǵany – áleýmettik jelini bir shýlatqan edi. Óz kezeginde Tramp sýretke qatysty pikir bildire otyryp, BAQ ókilderin synady.

«Angela Merkelmen qarym-qatynasymyz jaqsy, biraq ótirikshi BAQ kelissóz barysynan nashar sýretterdi jarıalap qoıǵan. Onda quddy bir AQSH-tyń birde-bir prezıdenti suramaıtyn dúnıeni talap etip turǵandaımyn», - dep jazdy amerıkalyq basshy Twitter-degi paraqshasynda.

Sonymen qatar, Angela Merkel men ózge basshylardyń kúlip turǵan sýretterin jarıalap, halyqty sendirgisi kelgenge uqsaıdy.

G7 samıti 8-9 maýsymda Kvebek qalasynda ótken. Bastapqyda qatysýshy elder ortaq komúnıke qabyldady dep aıtyldy, alaıda Tramp keıinirek bul qujatty qoldamaıtynyn málimdedi.