Shyǵys Qazaqstan oblysy Katonqaraǵaı aýdany Aqqaınar aýylynyń jumysshylary qubyr tartý kezinde adamnyń bas súıegi men kóne zattardy taýyp aldy, dep habarlaıdy Qamshy.kz aqparat agenttigi. 

Jumysshylar jer qazyp, qubyr tartyp jatqan kezde ekskovatorǵa adamnyń bas súıegi men kóne zattar ilikken.

Bul týraly Facebook áleýmettik jelisinde Álkeı Marǵulan atyndaǵy arheologıa ınstıtýtynyń ǵylymı qyzmetkeri Ǵalymjan Qıasbek jazdy. Berel aýmaǵynda qazba jumystarymen aınalysyp júrgen ǵylymı qyzmetker jańalyqty estı sala bir top mamanmen Aqqaınar aýylyna jetken. 

"Berel qorymynda qazbadamyz. Búgin aıaqasty telefon qońyraýy shyr etti. Katonqaraǵaı aýdany Aqqaınar (Chernova) aýylynda sý qubyryn tartyp jatqan ekskovatorshy kúregine kisi súıegi men taǵy bir zattar iligipti. Bes qarýymyzdy asynyp 5 adam, joq 6 adam zý ete qaldyq: Eldos Qarıev (SHQMÝ), Samat Samashev (tarıhı-áskerı mýzeı. Astana), Sergeı Vıktoruly (Peterbor), men jene SHQMÝ-dyń eki stýdenti: Suńǵat pen Túlek. Barsaq adamnyń bas súıeginiń jaǵarǵy bóligi men qola qazandy jáne temir buıymnyń synyqtaryn aq mataǵa jınap qoıypty. Qola qazan saq-skıf (iskýs) kezeńine jatatyn, ádeıi izdep júrip, qazyp júrip taba salatyn dúnıe emes!)) Óte tamasha olja! Osyndaı dúnıelerdiń ǵylymı arheologıalyq qazbalardan emes, kezdeısoq qazbalardan tabyla ketetini qalaı qyzyq!) "Altyn shyqqan jerdi belden qaz!" demekshi kezdeısoq buzylǵan eskertkish ornyn jaqsylap arshyp, tazalap qazba jasadyq. Kisi súıegi jer betinen 20-30 sm-deı ǵana tereńdikte jatqan bolyp shyqty! Jer betinde eshbir úıindiniń izi de qalmaǵan. Sol mańaıda turyp jatqan aýyl adamdarynyń aıtýynsha qazir qubyr salynyp jatqan kóshe dál joldyń ústi bolmaı turǵan jyldary (20-30 jyl buryn, tipti odan da ereterekte) úıdiń orny bolǵan, baý-baqsha bolǵan jer eken. Biz qazý barysynda rasynda saq adamynyń súıekteriniń birazy sol erterekte ornynan qozǵalyp qoparylǵan, jan-jaǵy qurylys qaldyqtary men mal súıekteri sıaqty qoqysqa toly bolyp shyqty. Oba ústindegi úıigi, tipti qabir shuńqyrynyń biraz bóligi sol talaı jyldardan bergi jerdi ıgerý kezeńderinde qyryp alynyp juqaryp kete bergen syńaıly. Qalǵan qabirdi qazý barysynda bir emes eki kisini qatarynan basyn batysqa qaratyp qoıǵany anyqtaldy", - delingen habarlamada. 

Sózin túıindeı kele Ǵalymjan Qıasbek qazba jumystary tolyq aıaqtalmaǵanyn, jaqsy jańalyqtan úmitti ekenin jetkizdi.