2018 jyly Qazaqstanǵa 54 myńnan asa TMD azamattary keldi. Bul týraly Astana qalasy İİD-niń kóshi-qon qyzmeti basqarmasy habarlady.
Vedomstvo bergen málimetke sáıkes, aǵymdaǵy jyldyń alǵashqy 5 aıynyń ishinde elimizge kelgen mıgranttardyń 82 paıyzy (54 722 adam) TMD memleketterinen, al qalǵan 18 paıyzy (12 286 adam) alys shetelden kelipti.
Sondaı-aq İİD-niń ókilderi qaı mezgilde shet el azamattarynyń kóbirek keletinin aıtty.
«Jaz, kóktem aılarynda shet el azamattary jumys isteýge kóbirek keledi. Iaǵnı, 27 358 adam eńbek etý úshin keldi», – dedi bólim basshysy Jandos Ilásov.
Buǵan qosa, 1 607 adam qyzmet boıynsha; 36 204 jeke isterimen; 181 týrıs retinde; 862 bilim alý úshin; 35 adam mısıonerlik qyzmetpen; 761 adam basqa da maqsattarymen kelgen.
Ortalyq ashylǵaly elimizge Qytaıdan – 3 479; Úndistannan – 2 097; Mońǵolıadan – 1 193; Túrkıadan – 795, Ózbekstannan – 37 846, Reseı Federasıasynan – 5 445, Qyrǵyzstannan – 6 091, Tájikstannan – 2 251, Ázerbaıjannan – 1 825 adam kelgen.
Aıta keteıik, 2018 jyldyń 12 qańtarynda Astana qalasynda mıgrasıalyq HQKO ashylǵan bolatyn. Atalǵan ortalyq kóshi-qon qyzmetin jaqsartý úshin ashylǵan bolatyn. Onyń basty maqsaty - kóshi-qon salasyndaǵy kedergilerdi joıý, sondaı-aq sheteldik azamattarǵa memlekettik qyzmet túrlerin kórsetý bolyp tabylady. Ol boıynsha eńbek mıgranttary ár 3 aı saıyn tirkelip, salyqty tólep otyrady (1 aıǵa 2 AEK, 2 aıǵa – 4 AEK, 3 aıǵa – 6 AEK).
Mıgrasıalyq HQKO Imanov kóshesinde, 31 ornalasqan. Ol saǵat tańǵy 9.00-den keshki 18.30-ǵa deıin úzilissiz jumys isteıdi. Bul jerde medısınalyq tekseris pen daktıloskopıadan ótip, saqtandyrý polısin rásimdeýge jáne jeke sáıkestendirý nómirin alýǵa bolady. Buǵan deıin sheteldikter Astanada jumys isteýge ruqsat alý úshin bes kún júrse, endi ruqsatty bir saǵattyń ishinde rásimdeı alý múmkindigine ıe boldy. Al, aldaǵy ýaqytta osyndaı ortalyqty Esil jáne Saryarqa aýdandarynda ashý josparlanyp otyr.
Ábdrahmanova Amınam Ahmetjanqyzy
