Syrtqy ister mınıstri Qaırat Ábdirahmanov senat tóraǵasy Qasys-Jomart Toqaevtyń Qazaqstandaǵy 2020 jyly ótetin saılaý týraly aıtqanyna pikir bildirdi. Bul týraly syrtqy saıası vedomstvosynyń baspasóz qyzmeti habarlady.

Budan buryn Toqaev Bı-bı-sı-degi Hardtalk baǵdarlamasyna bergen suhbatynda 2020 jyly ótetin prezıdent saılaýyna Nursultan Nazarbaevtyń qatyspaýy múmkin ekenin aıtqan.

«Senat tóraǵasy Qasym-Jomart Toqaev Hardtalk baǵdarlamasyna bergen suhbatynda óziniń naǵyz kásibı ári saýatty maman ekenin kórsetti. Bizdiń ishki saıasatymyzdy túsindirip, Qazaqstannyń halyqaralyq pozısıasyn damytý turǵysynan alyp qaraıtyn bolsaq, bul óte mańyzdy. Suhbattyń aýdarylǵan tolyq nusqasyn Senat Parlamentiniń saıtynan kóre alasyzdar», - dedi Qaırat Ábidarhmanov.

SİM basshysynyń aıtýynsha, Qazaqstanǵa degen qyzyǵýshylyq jyldan jylǵa artyp keledi. Memleket iri ınvestısıalarǵa kóz tige bastady.

«Qasym-Jomart Toqaevtyń Qazaqstannyń damý jolyndaǵy Nursultan Nazarbaevtyń rólin aıqan kórsetken. Elbasy quryp ketken saıası model berik. Biz «Astana» halyqaralyq qarjy ortalyǵyn qostyq, álim boıynsha ınvestısıalar men jańa tehnologıalardy ózimizge tartyp kelemiz. Senat spıkeriniń suhbatynda munyń ashyq ári júıeli túrde qamtylǵan», - dep keltirdi mınıstrdiń sózin vedomstvo habarlamasy.

Sonymen qatar Ábirahmanov suhbattyń kúrdeli bolǵanyn aıtyp ótti.

Buǵan deıin QR Aqparat jáne komýnıkasıalar mınıstri Dáýren Abaev Toqaevtyń aıtqanyna baılanysty pikir bildirgen bolatyn. Óz sózinde mınıstr Elbasynyń saılaýǵa túsýi Qazaqstan úshin tıimdi ekenin málimdedi.

«Qasym-Jomart Kemeluly aıtqandaı, 2020 jylǵa deıin áli biraz ýaqyt bar. Sheshimdi Memleket basshysynyń ózi qabyldaıdy. Biz buǵan 2020 jyly sol kezdegi jaǵdaımen  qaraýymyz kerek. Kóp jyl Prezıdent qyzmetin atqarǵan adam, sonymen qatar Elbasynyń saıasat pen ekonomıkadaǵy, halyqaralyq isterdegi zor tájirıbesi men halyqaralyq bedelin eskere kele, Qazaqstan Elbasynyń 2020 jylǵy prezıdent saılaýyna qatysqanynan tek utady dep sanaımyn, - degen edi Dáýren Abaev.