AQSH prezıdenti Donald Tramp qytaılyq kompanıalardyń AQSH-tyń tehnologıalyq salasyna ınvestısıa salýyna tyıym salýdy josparlap otyr dep habarlady óz derekkózderine silteme jasaǵan Wall Street Journal (WSJ) . Basylym málimetinshe, Vashıngton sonymen qatar Qytaıǵa tehnologıalyq qural-jabdyqtar eksporttaýdy da shekteýi múmkin.

Wall Street Journal Tramp josparyn osy aptanyń sońyna qaraı jarıalaıtynyn aıtady. AQSH shekteýler arqyly Qytaıdyń "Qytaıda jasalǵan 2025" strategıasyna qarsy turmaq. Vashıngtonnyń esebi boıynsha, bul strategıa Qytaı kompanıalaryna sheteldik kompanıalarmen básekege túskende basymdyq beredi.

Maýsymnyń ortasynda AQSH bıligi Qytaıdan ımporttalatyn 34 mıllıard dollardyń taýaryna shildeden bastap salyqty kóteretinin habarlaǵan. Qytaı buǵan jaýap sharalaryn qabyldaıtynyn málimdegen. Vashıngton budan soń Pekın ımport taýaryna baj salyǵyn salsa, AQSH shekteý salǵan taýarlar tizimi ulǵaıýy múmkin ekenin eskertken. Qosymsha salyq salynatyn taýar quny 16 mıllıard dollardy quramaq.