Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Batys Qazaqstan oblysy boıynsha departamenti Kórsetiletin memlekettik qyzmetter basqarmasynyń bas mamany N. Nuralıeva bylaısha jetkizgen edi.
-«Elektrondyq úkimet» portaly kúnnen-kúnge tanymal bolyp qana qoımaı, árbir azamatqa qoljetimdi bolýymen erekshelenýde. BQO aýdandary men aýyldyq okrýgterinde «Elektrondy úkimet buryshy» iske qosyla bastady. Elektrondy úkimet buryshynyń qyzmetin paıdalaný arqyly turǵyndar bir jaǵynan ýaqytyn únemdeıdi ári mashyqqannan keıin sıfrlyq tehnologıany meńgergen tulǵaǵa aınalady. Jýyrda elektrondyq úkimet portalynda «Anyqtamasyz qyzmet» «Paper free» servısi iske qosyldy. Jańa pılottyq jobaǵa sáıkes SMS-habarlama arqyly qyzmet alýshynyń ruqsaty rastalǵan jaǵdaıda úshinshi tulǵalarǵa anyqtamalar alýǵa múmkindik beriledi. Bul servısti qoldaný úshin mobıldi azamattar bazasyna tirkelý qajet.
«Anyqtamasyz qyzmet» mehanızmine sáıkes múddeli tulǵa elektrondyq úkimet portalynda avtorızasıadan ótýi tıis. «Úshinshi tulǵalardyń anyqtama alý servısi» bólimin tańdap, jeke sáıkestendirý nómirin (JSN) jazýyna bolady. Eger azamat mobıldi úkimetter bazasynda tirkelgen bolsa, múddeli tulǵa anyqtama túrin tańdap, óziniń elektrondyq-sıfrlyq qoltańbasymen qol qoıady. Sol sátte portal avtomatty túrde azamatqa SMS-habarlama joldap, úshinshi tulǵaǵa málimet berý, bermeý jóninde sheshim qabyldaýyn suraıdy. Azamat eki saǵat ishinde jaýap berýi tıis. Ońtaıly jaýap alǵannan keıin anyqtamasyn ala alady. Mobıldik úkimetke tirkelý úshin, paıdalanýshy elektrondyq úkimet portalynyń «jeke kabınetindegi», «telefon» syzyq jolyna telefon nómirin engizip, osylaısha ózin Portaldaǵy mGov mobıldik qorynda tirkeý nemese halyqqa qyzmet kórsetý ortalyǵyna júginip, telefon nómirin bekitý kerek. Atalǵan servısti qoldanýdy keńinen nasıhattaý maqsatynda ótken aptada QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń BQO boıynsha departamentiniń uıymdastyrýymen páter ıeleriniń kooperatıvteri basshylary men komýnaldyq qyzmetter ókilderiniń qatysýymen semınar-keńes ótti. Onda Halyqqa qyzmet etý ortalyǵynyń qyzmetkerleri qatysýshylarǵa servısti qoldaný boıynsha tolyq túsinik berdi. Aldaǵy ýaqytta bizdiń departament mundaı sharalardy jalǵastyra túsedi.
