Qazaq tili álipbıin latyn grafıkasyna 2025 jylǵa deıin kezeń-kezeńmen kóshirý josparyna sáıkes jańa mindetter júkteldi. Bul týraly Parlament Senatynda QR Mádenıet jáne sport mınıstri Arystanbek Muhamedıuly málim etti.
«Elbasy Nursultan Ábishuly Nazarbaevtyń «Qazaq tili álipbıin kırıllısadan latyn grafıkasyna kóshirý týraly» Jarlyǵyn iske asyrý boıynsha Mınıstrlik birqatar jumystar atqarýda. Atap aıtqanda, Memleket basshysynyń atalǵan Jarlyǵy negizinde Qazaq álipbıin latyn grafıkasyna kóshirý jónindegi ulttyq komısıa jáne onyń janyndaǵy jumys toptarynyń josparlary bekitildi. Osy baǵytta birqatar sharalar qolǵa alyndy», - dedi mınıstr.
Arystan Muhamedıulynyń aıtýynsha, jańa álipbıdiń emle erejeleri keń túrde talqylanyp, onyń tujyrymdamasy maquldandy. Osy tujyrymdamanyń negizinde kópshilik qoldanysyna enetin emle erejeler taıaý ýaqytta daıyn bolady.
«Bul baǵytta mınıstrlik janynan Shaısultan Shaıahmetov atyndaǵy «Til-Qazyna» ulttyq-ǵylymı tájirbıelik ortalyǵy quryldy. Ortalyqtyń qyzmet aıasy keńeıip, qazaq tili álipbıin latyn grafıkasyna 2025 jylǵa deıin kezeń-kezeńmen kóshirý jónindegi is-sharalar josparyna sáıkes jańa mindetter júkteldi», - dep atap ótti QR Mádenıet jáne sport mınıstri.
Bul rette ınovasıalyq IT tehnologıalardy qoldana otyryp, balalar men eresekterge arnalǵan onlaın-qosymshalar, elektrondyq nusqadaǵy oqý kýrstaryn ázirleý; latyn grafıkasyna mátindik qaıta kodtaýshyǵa arnalǵan konverter baǵdarlamasyn jáne IT qosymshasyn ázirleý; qazaq álipbıin latyn grafıkasyna aýystyrýdyń negizgi aspektileri týraly azamattardy aqparattandyrý deńgeıin anyqtaý boıynsha áleýmettanýshylyq zertteýler júrgizý; qazaq álipbıin latyn grafıkasyna kóshirý boıynsha túsindirý jumystaryn júrgizý úshin beıne bloktar ázirleý eskerilgen.
Sonymen birge, A. Muhamedıuly ortalyqtyń ǵylymı áleýeti artyp kele jatqanyna toqtalyp ótti. Búgingi tańda munda ǵalymdar men bilikti mamandar tartyldy. Qazir Ulttyq ǵylym akademıasynyń akademıgi, 2 ǵylym doktory, 6 ǵylym kandıdaty jumys jasaýda.
Aıta keteıik, Mınıstrlik qazirgi kezeńde jańa álipbıge kóshý barysynda atqarylyp jatqan jumystardy baıandaý, túsindirý, ádistemelik kómekter kórsetý maqsatynda tıisti ǵylymı sharalar júrgizdi. Oǵan Ulttyq komısıa jáne jumys toptary músheleri, Parlament depýtattary,elimizdiń jetekshi lıngvıs ǵalymdary qatysty.
