Almaty ákimi Baýyrjan Baıbek ulttyq biryńǵaı testileýdiń qorytyndysy boıynsha eń joǵary bal jınaǵan №123 mektep - gımnazıanyń túlegi Shıara Qudaıbergenovamen kezdesti. Bul týraly Almaty ákimdiginiń baspasóz qyzmeti habarlady.
Almatynyń oqýshylary 101,2 bala jınap, elimiz boıynsha birinshi orynǵa shyqty. Ótken jylmen salystyrǵanda bıyl «Altyn belgi» ıeleriniń qatary 100 túlekke artty.
Shıara Qudaıbergenova bolashaq mamandyǵyn anyqtaǵanyn, «Logıstıka» mamandyǵy boıynsha qazaqstandyq ýnıversıetteri biriniń ekonomıka fakúltetine túsýdi josparlaǵanyn aıtty.
«Memleket basshysyna úlken rahmet, ol bilim men el jastaryna turaqty nazar aýdaryp keledi. Ózimniń jáne ata- anamnyń atynan 11 jyl boıyna bilim nárimen sýsyndatqan barlyq muǵalimderge alǵys aıtamyn», - dedi ol.
Kezdesý barysynda qala basshysy oǵan Davostaǵy Búkilálemdik ekonomıkalyq forýmnyń negizin qalaýshy Klaýs Shvabtyń «Tórtinshi óndiristik revolúsıa» atty kitapty syılady, ol Prezıdenttiń «Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda basylyp shyqqan edi.
«Memleket basshysy «Rýhanı Jańgyrý» Baǵdarlamasynda «eger qundylyq júıesinde bilim baǵa jetpes baılyq bolsa, onda ultty tek jetistik qana kútip tur» degen bolatyn. Búgin Almaty elimizdiń iri bilim, mádenıet jáne ǵylymı ortalyǵy ekendigin taǵy bir ret dáleldedi. Alǵan bilimderi men jınaǵan joǵary bal arqasynda túlekterimizdiń basym kópshiligi elimizdiń joǵary oqý oryndaryna grantqa túse alady. Bıylǵy jyly «Prezıdenttiń bes áleýmettik bastamasy» aıasynda buryn- sońdy bolmaǵan qosymsha 20 myń stıpendıa bólinip, 75 myń oryndy jańa stýdenttik jataqhana qurylysy bastaldy», - dep atap ótti Baýyrjan Baıbek.
2018 jyly ulttyq biryńǵaı testileýge 6735 túlek qatysty, olardyń 3999 qazaq tilinde, 2731 orys tilinde, 5-i aǵylshyn tilinde synaq tapsyrdy. Qatysýshylar sany ótken jylmen salystyrǵanda 802 adamǵa ósti. 379 túlek shyǵarmashylyq emtıhandy tańdady.
Qala boıynsha ortasha bal - 101,2 ótken jylǵy kórsetkishten 3,7 balǵa joǵary. Túlekterdiń 55%-y 100 jáne odan joǵary bal jınady, bul ótken jylmen salystyrǵanda 7%-ǵa kóp. Almatylyq 314 túlek 130-140 bal jınady.
Eń joǵary 140 baldy №123 mektep- gımnazıa túlegi Shıara Qudaıbergenova jınady.№162 mektep- gımnazıa túlegi Daýlet Hamzın men №104 jalpyorta bilim beretin mektep túlegi Áıgerim Ibaǵalıeva 139 balǵa qol jetkizdi. 14 túlek 137 jáne 138 baldan jınady.
Aıta keterligi, respýblıkalyq olımpıadada Almaty oqýshylary 13 jyl qatarynan komandalyq birinshi orynnan kórinýde. Respýblıkalyq ǵylymı saıysta 16 ret qatarynan, 11 synyp oqýshylary arasynda matematıka, fızıka, hımıa jáne bıologıa pánderi boıynsha ótken Prezıdenttik olımpıadada besinshi ret jeńimpaz atandy. 2018 jyly jaratylystaný- matematıka pánderi boıynsha jasóspirimder arasynda alǵash ret ótken respýblıkalyq konkýrsta da birinshi oryndy jeńip aldy.
Bıylǵy jyly barlyq mektepterde fızıka, hımıa, bıologıa jáne lıngafondy-mýltımedıalyq kabınetter men keshender ashylǵan. Mmektepterdiń bári keń jolaqty ǵalamtorǵa 100% qosylǵan. «Sıfrly Qazaqstan» memlekettik baǵdarlamasyn júzege asyrý úshin aldaǵy oqý jylynda qalanyń 80 mektebinde arnaıy İT lıseıler men İT synyptar ashý josparlanǵan. Qazirgi kezde qalanyń barlyq mektepteriniń oqý kabınetterine mýltımedılik úshtik alynýda.
