Qazaqstannyń halyq artısi Roza Rymbaeva demalys kúnderi Astanada ótetin «Dýmandy Saryarqa» konserttik baǵdarlamasyna qatysady, dep habarlaıdy Astana ákimdiginiń resmı saıty. 

Qazaqstandyq estrada juldyzy elordanyń 20 jyldyǵyn merekeleý aıasynda 1 shildede Úrker kentinde (Ilınka) óner kórsetedi. Konsert №69 mektep-gımnazıasynyń aýmaǵynda ótedi. Elorda ákimdiginiń muryndyq bolýymen ótetin shara saǵat 19:00-de bastalady.

Qala turǵyndary men qonaqtary Roza Rymbaevadan basqa Dosymjan Tańatarovtyń, Dostyń, aǵaıyndy Júginisovterdiń, «Art Dombyra» trıosynyń, «Dáýir» dýetiniń, Ásem Omarova men basqa da ártisterdiń ónerin tegin tamashalaı alady.

Eki jyldan beri jazda mádenı-buqaralyq is-sharalar tek qalada ǵana emes, sonymen qatar onyń shet aýmaqtarynda da uıymdastyrylyp keledi. Jeksenbi kúnderi Prıgorodnyı, Internasıonalnyı, Mıchýrıno, Kúıgenjar, Óndiris, Jeleznodorojnyı, Úrker, Kóktal, Promyshlennyı jáne Kazgorodok kentteriniń turǵyndary úshin merekelik sharalar ótkiziledi.

Demalys kúngi «Dýmandy Saryarqa» konsertteri turǵyn alaptary turǵyndarynyń arasynda keńinen belgili. Shara aıasynda tanymal qazaqstandyq ártister, Qanat Áljapparov pen Qaırat Ádilgereı syndy ázilkeshter óner kórsetedi. Budan basqa, bı jáne mýzykalyq ujymdar, kóshe teatrlarynyń ártisteri, anımatorlar, ınteraktıvti oıyndar ótkizetin boıshań qýyrshaqtar da belsene qatysady.

Bıyl demalys kúngi «DýmandySaryarqa» konsertteri 1 maýsymnan 2 qyrkúıekke deıin uıymdastyrylady. Barlyq sharalar ashyq alańdarda tegin ótedi.