Almatyda «Samuryq-Qazyna» Ulttyq ál-aýqat qory» AQ Basqarma Tóaǵasy Ahmetjan Esimovtiń basshylyǵymen jabyq pishindegi jańa «Túrksib» qosalqy stansıasy iske qosyldy. Jańa energıa nysanynyń iske qosylýy - 2008 jyly bastalǵan Almaty qalasyn elektrmen ornyqty jabdyqtaý baǵdarlamasyn tolyq aıaqtaýǵa múmkindik berdi.

«Túrksib» qosalqy stansıasy transformatorlyq qýatty 30 MVA-ǵa arttyrady jáne Túrksib aýdanynyń ortalyq bóligin, sondaı-aq «Qol jetimdi baspana» baǵdarlamasy aıasynda salynǵan «Jas Qanat» jańa shaǵyn aýdanyn, «Almaty aglomerasıasynyń 2030 jylǵa deıingi óńiraralyq sqemasy» baǵdarlamasy boıynsha qalaǵa qosylǵan «Qaırat» shaǵyn aýdanynyń negizgi bóligin elektrmen qamtamasyz etedi. 

«Samuryq-Qazyna» UÁQ» AQ Basqarma Tóraǵasy Ahmetjan Esimov elimizdiń eń iri megapolısin energıamen úzilissiz qamtamasyz etý máselesine úlken mán beriletinin, endigi jalǵyz mindet – osy qýat kózderin durys paıdalaný ekenin atap ótti.

«Memleket basshysy osydan on jyl buryn alǵa qoıǵan mindetterdiń biri – Almaty qalasyn elektrmen ornyqty jabdyqtaý bolatyn. Búgin, qosalqy stansıanyń iske qosylýymen, bul másele tolyq sheshildi.  Endigi qalǵan jalǵyz mindet – osy qýat kózderin durys paıdalaný, óıtkeni jumsalǵan 20 mlrd teńgeden astam qarajat tıimdi jumys isteýi kerek», - dedi Ahmetjan Esimov.

Óziniń sany jaǵynan 33-shi qosalqy stansıa iske qosylǵannan keıin, Almaty qalasynyń sheginde energıamen jabdyqtaý kartasy  tolyǵymen «jasyl túske» boıalatynyn atap óteıik, bul qala aýmaǵynda elektr energıasy tolyq qol jetimdi ekenin bildiredi.

«Esterińizde bolar, osydan 10 jyl buryn jaryqty kezek-kezegimen, avarıalyq túrde sóndirip, elektrmen ornyqty jabdyqtaı almaıtynbyz, bul qalanyń jáne bıznestiń damýyna kedergi keltirip, halyqtyń áleýmettik jaǵdaıyna áser etetin», - dep atap ótti A.Esimov. 

Sondaı-aq, Ahmetjan Esimov Almaty qalasyna jumys sapary barysynda qaladaǵy energetıkalyq keshenniń ornyqty damýy úshin úlken mańyzǵa ıe «Alataý Jaryq Kompanıasy» AQ-nyń energıa obektilerinde boldy. A.Esimov júktemeni PS-220/110/10 kV №131A «Taýly qyrat» qosalqy stansıasynan PS-220/110/10-10 kV №160A «Ermensaı» qosalqy stansıasyna aýystyrý jumystarymen tanysty. Bul joba «Taýly qyrat» qosalqy stansıasy ornalasqan aýmaqta laı kóshkini bolǵan jaǵdaıda, qosalqy stansıanyń qıraý jáne tutynýshylardyń elektrden jappaı aǵytylý qaýpi týyndaýyna baılanysty iske asyrylýda. Avarıalyq jaǵdaılardy boldyrmaý maqsatynda, júktemeni «Gornyı gıgant» shaǵyn stansıasynan «Ermensaı» qosalqy stansıasyna aýystyrý týraly sheshim qabyldanǵanyn aıta keteıik. 

2011 jyly «Ermensaı» QS iske qosylýy Almaty qalasynda Qysqy Azıada-2011 oıyndary ótkizilýine oraılastyrylǵan bolatyn. Júktemelerdi aýystyrý jobasyn aıaqtaý 2018 jylǵa josparlanǵan, sodan keıin «Taýly qyrat» QS joıylady.