Memleket basshysy elordanyń jańa nysandarymen tanysý barysynda Astana qalasynyń sol jaǵalaýynda ornalasqan Botanıkalyq baqqa bardy.

Qazaqstan Prezıdenti «Jasyl el» jastar eńbek jasaǵynyń ókilderimen áńgimelesip, bas qalany jáne búkil Qazaqstandy kógaldandyrý úshin júrgizilgen jumystardyń mańyzdylyǵyn atap ótti.

Nursultan Nazarbaev Botanıkalyq baqtyń ortasynda ornalasqan oranjereıany aralap kórip, ony otandyq jáne halyqaralyq mamandandyrylǵan ınstıtýttardyń ǵylymı áleýetin paıdalana otyryp ári qaraı damytý qajettigin aıtty.

Tanystyrylym rásimi kezinde Memleket basshysy elordanyń kóshirilý tarıhy men jańa astanany salýdyń negizgi kezeńderi jóninde aıtty.

– Astana tóńireginde orman óspeıdi dep únemi aıtylatyn. Biraq, búginde mundaǵy 83 myń gektar jerge otyrǵyzylǵan aǵashtardyń bıiktigi 20-25 metrge deıin jetti. Jyl saıyn orman alqabynyń aýmaǵy bes myń gektarǵa ulǵaıyp keledi. Osy ormandy «Shortandy-Býrabaı saıajaı aımaǵymen» qosqymyz keledi, – dedi Qazaqstan Prezıdenti.

Sondaı-aq, Qazaqstan Prezıdentine Botanıkalyq baqtyń sánin keltirgen, jaryq shashqan mýzykaly sýburqaq kórsetildi. Ony «Óńirlerdiń Astanaǵa tartýy» jobasy aıasynda Shyǵys Qazaqstan oblysy saldy.

***

Baq aýmaǵynda velosıped joly, júgirýge arnalǵan jolaq, sporttyq jabyndy, jaıaý júrginshilerge arnalǵan kópir jáne jasandy sý qoımasy bar. Kógaldandyrý aýmaǵynyń jalpy kólemi 613 myń sharshy metrden asady. Munda  Eýropa, Azıa jáne Soltústik Amerıka elderinen ákelingen alýan túrli butaly ósimdikter men aǵashtar bar.