Astananyń 20 jyldyq mereıtoıy qurmetine Atyraý oblysy elordanyń oń jáne sol jaǵalaýlaryn jalǵaıtyn kópir tartý etti, dep jazady Qamshy.kz aqparat agenttigi.
Atyraý oblysynyń ákimi Nurlan Noǵaev Nursultan Nazarbaevqa kópirdiń saıabaq aımaǵyndaǵy jaıaý júrginshiler legi men velosıped jelisin Esil ózeniniń oń jaǵalaýymen jalǵaıtynyn baıandady.
Qazaqstan Prezıdenti jańa kópir Atyraý oblysynyń laıyqty tartýy ekenin jáne onyń elorda turǵyndary men qonaqtaryna uzaq jyldar boıy qyzmet etetinin atap ótti.
"Astanalyqtar bul nysandardy daıyndaýǵa atsalysqan barlyq óńirlerimizge alǵys aıtýǵa tıis. Bas qalany búkil el bolyp turǵyzdyq jáne búkil el qýanyshqa kenelýi kerek", – dedi Memleket basshysy.
Sonymen qatar, Astana qalasynyń ákimi Áset Isekeshev Nursultan Nazarbaevqa jalpy uzyndyǵy 56 shaqyrym bolatyn velosıped kóliginiń ınfraqurylym nysandaryn tanystyrdy. Velosıped joly Esil ózeniniń boıy men sol jaǵalaýy jáne EKSPO kesheniniń nysandary arqyly ótedi. Ol qalalyq saıabaqtaǵy shańǵy jáne rolıkke arnalǵan joldar men Ilınka kentinen "jasyl beldeý" arqyly ótetin velosıped jolaqtaryn baılanystyrady. Velotrekter arnaıy ústelderi jáne velosıped qoıatyn oryndary bar, wi-fi jáne telefondy qýattandyrý múmkindigi qarastyrylǵan "aqyldy ınfraqurylymmen" jabdyqtalǵan.
Shara sońynda ashyq aspan astyndaǵy amfıteatr sahnasynda Atyraý oblysy fılarmonıasynyń óner ujymy uıymdastyrǵan "Uly dala júregi – Astanama" atty teatrlandyrylǵan konserttik baǵdarlama kórsetildi.
Aıta keteıik, Kópirdiń dızaıny sáýlet óneriniń álemdik úrdisine sáıkes keledi. Onyń syrt kelbeti zamanaýı úlgige saı, al jaıaý júrginshilerge arnalǵan ishki jaǵy jaryq pen kóleńkeniń qyzyqty kórinisin beıneleıdi.
Nysannyń jalpy uzyndyǵy – 313,5 metr, eni – 10,5 metr. Kópirde jaıaý júrginshilerge arnalǵan alty metrlik jolaq, velosıpedshilerge arnalǵan úsh metrlik jolaq, sondaı-aq eni 0,5 metr bolatyn qaýipsizdik jolaǵy jáne 0,5 metrlik sharbaqty qorshaýǵa arnalǵan eki jolaq bar. Kópir jabyndysy úshin lıtakrıl paıdalanylǵan. Bul nysan aýa raıy jaǵdaıy eskerile otyryp salynǵan. Ony jobalaǵanda jeldiń áseri de esepke alynǵan. Salmaǵy – 1920 tonna.
Velosıpedshiler men jaıaý júrginshilerge arnalǵan kópirdi jáne velosıped ınfraqurylymyn "Óńirlerdiń Astanaǵa tartýy" jobasy aıasynda Atyraý, Túrkistan, Soltústik Qazaqstan, Pavlodar, Qostanaı, Aqmola jáne Jambyl oblystarynyń ákimdikteri turǵyzdy.
Prezıdenttiń Esil ózeniniń jaǵalaýyna jasaǵan kishigirim sapary elorda turǵyndaryna ádemi áser syılaǵany sonshalyq, olar kópke deıin taramaı, jańa kópirdiń janynda sýretke túsip, máz bolysty.
