Búgin Úkimet otyrysynda kún tártibindegi máselelerdi qaraý aldynda QR Premer-Mınıstri Baqytjan Saǵyntaev Astananyń 20 jyldyǵymen quttyqtady.

"Qurmetti áriptester!
Eń aldymen, barshańyzdy elimiz úshin aıryqsha mańyzdy beles – aıaýly Astanamyzdyń 20 jyldyǵymen shyn júrekten quttyqtaımyn!
Astana kúni – bir qalanyń ǵana meıramy emes, búkil el bolyp atap ótetin jalpyhalyqtyq mereke.
Sebebi, Qazaq Eliniń táýelsiz memleket retinde ornyǵýy, synaqtardan súrinbeı ótip, damýdyń dańǵyl jolyna túsýi, bári elimizdiń bas ordasymen tyǵyz baılanysty.
El bola alamyz ba, álde zamannyń alapat jeline ushyp joǵalamyz ba degen taǵdyrly sátte halyqty bıik maqsatqa jumyldyryp, bolashaqqa bastaǵan Astana – jańǵyrǵan, jańa Qazaqstannyń jarqyn sımvoly.
Ol – qasterli Táýelsizdigimizdiń uly tuǵyry, Alash jurtynyń aıbary, Elbasymyzdyń tól perzenti.
Basynda ózge túgili ózimiz kúmánmen qaraǵan ǵasyr jobasy Elbasynyń saıası kóregendigi men erik-jigeriniń arqasynda tabysty júzege asyp, nebári 20 jylda Arqa tórinde ǵajaıyp qala boı kóterdi.
Halqymyzdyń myń jyldyq talaıly taǵdyry men asqaq armandarynan nár alyp, saıyn dalada sámbi taldaı búr jarǵan bas ordamyz az ýaqytta el tiregi – alyp báıterekke aınaldy.
Astana – tereń tarıhtan tamyr tartqan dańqty ótkenimizdi búkil álem tańdaı qaqqan búgingi bıikterimizben jáne jahandyq naryqta básekelik qabileti joǵary, Máńgilik El bolar kemel keleshegimizben jalǵaıtyn Eldigimizdiń altyn arqaýy.
Qarasań kóz jetpeıtin Uly Dalanyń Aspanmen astasqan kókjıegine kóz salsaq, kók pen jerdi jalǵaıtyn altyn kópir ispetti Astananyń alyp munaralary alystan asqaqtap, menmundalaıdy.
Ol – barsha halqymyzdyń baqytty ómiri men úkili úmitiniń sımvoly.
Búginde elimizdiń saıası, ekonomıkalyq qana emes, mádenı, rýhanı júregi atanǵan Elorda Qazaqstannyń barlyq óńirleriniń basty qozǵaýshy kúshi bolyp, aımaqtardyń damýyna qýatty serpin berýde.

Qadirli áriptester!
Bas ordamyz – daryndy, maqsatker, eńbekqor, bilimdi jastardyń arman-múddesin bir arnaǵa toǵystyryp, barsha qazaqstandyqtardy biriktirgen kindik qala.
Ol tatýlyq pen turaqtylyqtyń, jasampazdyq pen beıbitshiliktiń sımvoly retinde tutas Eýrazıaǵa, odan qaldy, jer júzine laıyqty úlgi bolýda.
Álemdik deńgeıdegi bastamalar men is-sharalar Astanany jahandyq oqıǵalardyń ordasy retinde pash etti.
Osynyń bári – keń baıtaq Uly Dalanyń tórinde Uly Memleket qurǵan Elbasy Nursultan Ábishuly Nazarbaevtyń dara basshylyǵy men sheksiz eńbeginiń jemisi.
Sáni men saltanatyna barsha adamzat tańdaı qaqqan Baq ordamyzdy qaster tutý, ony damytyp, kórkeıte túsý – bárimizge ortaq paryz.
Elimizdiń asqaq rýhy men jasampazdyǵynyń jarqyn nyshany bolǵan Astananyń 20 jyldyǵymen barshańyzdy taǵy da shyn júrekten quttyqtaımyn!
Ortaq maqtanyshymyz, Otanymyzdyń júregi Astana tórtkúl dúnıeni túgel tamsandyryp, jaınaı bersin!
Mereke qutty bolsyn!" - dedi QR Premer-mınıstri.