Dóńgelek ústeldiń basty maqsaty – QR Qylmystyq kodeksiniń jańa redaksıasyndaǵy ólim jazasy jáne onyń balamasyn qoldaný stretegıasyn taldaý. Sarapshylardyń baǵalaýy boıynsha, Qylmystyq kodekstiń jańa redaksıasynda ólim jazasyna kesý baptary kóbeıýde. Bul halyqaralyq mindettemelerge jáne QR Prezıdentiniń 2009 jylǵy 24-shi tamyzynda qabyldanǵan Jarlyǵymen bekitilgen quqyqtyq saıası tujyrymdamaǵa qaıshy keledi, sondyqtan Kodekstiń jańa redaksıasynda ólim jazasyn qoldanýdy azaıtý maqsatynda sarapshylar dıalogy qajet. «Sońǵy jarty ǵasyrdyń ishinde búkil álemde ólim jazasyn joıý jáne ony qoldanýdy qysqartý úderisi baıqalyp otyr. Búgingi kúni ólim jazasy tek 5 elde saqtalyp otyr. Olar: Qytaı, Iran, Pákistan, Saýd Arabıasy men AQSH. Bul elderde ólim jazasyna kesý kórsetkishi 93%-dy quraıdy. Qalǵan rette ólim jazasy bolǵanymen is júzinde júzege asyrylmaıdy. Qazaqstan da álemde qalyptasqan jaǵdaıdan syrt qalmaı, 2003 jyldyń jeltoqsanynan bastap ólim jazasyna maratorıı jarıalaǵan. 10 jylǵa jýyq ýaqyttan beri jazanyń bul túri elimizde qoldanylmaıdy. Memleket basshysy kezeń-kezeńimen ólim jazasynyń sanyn qysqartyp, ony joıýǵa qatysty naqty tapsyrma bergen bolatyn. Osyǵan oraı, jańa Qylmystyq kodekste jazanyń bul túriniń qoldanýyna qatysty máselelerdiń barlyǵyn naqty kórsetýimiz qajet», - dedi jıyndy ashqan Májilis depýtaty Rahmet Muqashev. Atalmysh sharaǵa QR Parlamenti depýtattary, memlekettik organdar basshylary, úkimettik emes uıymdar, táýelsiz sarapshylar jáne halyqaralyq uıymdardyń ókilderi qatysty. Ólim jazasyn qoldanýǵa maratorıı engizilgenge deıin ólim jazasyn kesý týraly 536 úkim júzege asyryldy. Qazaqstan Respýblıkasy Prezıdentiniń Jarlyǵy boıynsha 2003 jyldan bastap ólim jazasyn qoldanýǵa maratorıı engizildi. Sol ýaqyttan bastap ólim jazasyn kesý týraly eshqandaı úkim júzege asyrylǵan joq. Búgingi tańda Qazaqstanda 100-ge jýyq azamat ómir boıy bas bostandyǵynan aıyrý jazasyn óteýde.