Elorda tynyshtyǵyn kúzetetin sarbazdar sany tolyqty. Ulttyq ulannyń astanalyq quramasynda elimizdiń 14 oblysynan shaqyrylǵan 800-ge jýyq jaýynger ant qabyldaıdy. Bas qala irgesindegi áskerı qalashyq aýmaǵynda jas Otan qorǵaýshylar eli men halqyna adal qyzmet etýge sert bermek.

Qyryq kún buryn 5573 áskerı bóliminiń tabaldyryǵyn attaǵan bul sarbazdar arnaıy daıyndyqtan ótip, saptyq júris pen ásker isiniń qyr-syryn meńgerip jatyr. Endi sál kúnde qalamyzdyń qoǵamdyq tártibin, qala turǵyndary men qonaqtarynyń tynyshtyǵyn kúzetetin bolady. Sondaı-aq, bas qalamyzda ótetin barlyq mádenı-kópshilik, saıası-qoǵamdyq, sporttyq sharalar men resmı basqoslar kezinde de qaýipsizdikti qamtamasyz etý – osy ulandardyń enshisinde. Elorda ulandary sheteldik delegasıalardy qarsy alýǵa, tabıǵı apattar men tótenshe jaǵdaılarda halyqqa kómek kórsetýge, daǵdarysty kıkiljińderde eldi tynyshtandyrýǵa jumyldyrylady.

Osyndaı jaýapty mindet atqaratyn bolǵandyqtan jedel quramaǵa jańadan qosylǵan jaýyngerler aǵa býyn sarbazdar sekildi arnaıy jattyǵýlar men daıyndyqtardan, nusqaýlyqtardan ótkizildi.

Saltanatty Ant qabyldaý sharasyna Ulttyq ulan Bas qolbasshylyǵy, memlekettik vedomstvolar men kúsh qurylymdarynyń basshylyqtary, Astana qalasy ákimshiliginiń jetekshileri, sondaı-aq «Nur Otan» partıasy men din ókilderi, ardagerler men oqýshylar qaýymy jáne sarbazdardyń týǵan-týystary qatysatyn bolady. Áskerı bólimniń alyp alańyna bir mezgilde 5myńnan asa adam jınalyp, jas jaýyngerlerdiń Otan qorǵaýshylar qataryna qosylýyna kýá bop, saltanatty sherýin tamashalaıtyn bolady. Sondaı-aq, qonaqtar «Ashyq esik kúni» aıasynda áskerı ómirdiń tynys-tirshiligimen, sarbazdardyń turmysymen, áskerı tehnıka jáne qarý-jaraq kórmesimen, Ulttyq ulan Ortalyq mýzeıiniń mol murasymen keńinen tanysa alady.