Atyraýda balyqshylar kúni merekesine arnalǵan is-sharalar bastaldy, dep xabarlaıdy Atyraý oblystyq Óńirlik komýnıkasıalar qyzmeti.

Tańerteń ertemen Jaıyq ózeniniń jaǵasynda sporttyq balyq aýlaý boıynsha týrnır ótti, jeńimpazdar túrli nomınasıalar boıynsha júldeler men syılyqtar aldy. Shıpajaı mańy jaǵalaýynda eki bekire zaýyty ózenge bekire balyqtarynyń 20 myń shabaǵyn jiberdi. Jas shabaqtardyń salmaǵy 3-ten 10 gramǵa deıin.
- Búginde 20 myń shabaqty jiberýimiz kezdeısoq emes-bıylǵy jyly Atyraý oblysynyń aýmaǵynda jumys isteıtin eki bekire zaýyty ózderiniń 20 jyldyq mereıtoıyn atap ótýde. Sondaı-aq, bul mańyzdy kún Qazaqstan astanasynyń 20-jyldyǵyna tuspa-tus keldi. Bul jyl saıynǵy dástúr jas balyqtardyń shyǵarylýy aımaqtaǵy qundy balyqtar sanynyń artýyna áser etetinine senimdimiz », - dedi Jaıyq-Atyraý bekire zaýytynyń dırektory Gılman Sarsemalıev.

İs-shara barysynda festıvál qonaqtary úshin bekire balyqtardyń kórmesi uıymdastyryldy. Onda reseılik bekire tuqymdas tikenek, belýga, sterlot jáne stella bekireleriniń eresek túrleri kórsetildi.

Oblystyq ákimdiktiń aldyndaǵy S.Beıbarys alańynda Atyraý óndirýshileriniń balyq ónimderiniń jármeńkesi bastaldy. Munda Atyraý qalasynyń turǵyndary men qonaqtar jańa pisken, qurǵaq jáne ystalǵan balyqty, sondaı-aq ár túrli jartylaı fabrıkattardy satyp aldy.

S.Beıbarys alańynda ártúrli baıqaýlar ótkizildi: kim balyqtan dámdi taǵam daıyndaıdy, kim balyqty tezirek tazalaıdy, kim balyq kóp aýlaıdy jáne kir tasyn kóterý men arqan tartýdan jarystar. Osydan keıin merekeniń qatysýshylary men qonaqtaryn balyqshylar kúnimen Atyraý oblysy ákiminiń birinshi orynbasary Serik Shapkenov quttyqtady.
- Jyl saıyn bizdiń eki bekire zaýyty ózenge shamamen 7 mıllıonǵa jýyq jas shabaqtardy jiberedi. Bizdiń óndiristik kooperatıvter jylyna 12 tonnaǵa deıin balyq alady, olardyń 85-90 paıyzy eksporttalady. Bul Atyraý oblysyndaǵy balyq ónerkásibi jaqsy qarqynmen damyp kele jatqanynyń taǵy bir kórinisi », - dedi Serik Shapkenov óz quttyqtaý sózinde.

İs-sharanyń barysynda balyq ónerkásibiniń ardagerleri men osy sala qyzmetkerlerin saltanatty túrde marapattady. Atyraý oblysynyń ákimi atynan eń basty tórt qyzmetker alǵys hattar aldy. Oblystyń 15 turǵyny Aýyl sharýashylyǵy mınıstrligi men Orman jáne janýarlar dúnıesi aımaqtyq komıteti dıplomdarymen marapattaldy, sodan keıin turǵyndar nazaryna merekelik konserttik baǵdarlama usynyldy.

Aıta keteıik, balyqshylar kúni merekesi saǵat 19.00-de S.Beıbarys alańynda merekelik konsert jáne merekelik otshashýmen aıaqtalady.