«Ústimizdegi jyldyń 4-8 shilde aralyǵynda Astana qalasynda ótken dástúrli «Azıa jańǵyryǵy» halyqaralyq festıvalinde Túrkistan oblysy "Ońtústik-Sırk" mekemesiniń "Eksklúzıv" toby altyn medaldi qanjyǵasyna baılady.
Astananyń týǵan kúnine oraı jyl saıyn elordada ótetin sırk óneriniń dodasyna bıyl Qazaqstan, Qyrǵyzstan, Ózbekstan, Túrkmenstan, Vetnam, Reseı, Belarýs, Fransıa, Kanada, Nıkaragýa, Efıopıa jáne Vengrıa syndy 13 memlekettiń 60-tan asa sırk maıtalmandary qatysyp, baq synady.
Qıynynan qıysqan kúrdeli trúkterden turatyn "Ólim dońǵalaǵy" nómirimen kópshilikti tań qaldyrǵan túrkistandyq jigitter bas júldege laıyq dep tanylyp altynnan alqa taqsa, kúmis júldeni-Belorýssıa eliniń mádenıet maıtalmandary, qola júldeni - Qazaq Memlekettik sırkiniń ártisteri ıemdendi.
Qazylar alqasyna «Astanalyq sırk» MKQK bas dırektory, QR eńbek sińirgen artısi Erik Joljaqsynov tóraǵalyq etse, tóreshiler quramynda Ýkraına ulttyq sırkiniń dırektory, KSRO halyq artısi Lúdmıla Shevchenko, Belarýs Memlekettik sırkiniń dırektory Vladımır Shaban, Monte-Karlodaǵy Halyqaralyq sırk festıvaliniń vıse-prezıdenti Ýrs Pıls, «Latıno» halyqaralyq sırk festıvaliniń prezıdenti Fabıo Montıko, Velkı sırkiniń bas dırektory Djerzı Kozıak, Maıamıdegi Faerbórdprodakshn kompanıasynyń prezıdenti Petr Dýbınskıı, «Erevan sırkiniń» kórkemdik jetekshisi, bas dırektory Sos Iosıf Petrosán, Saha Respýblıkasynyń «Marfa jáne Sergeı Rastorgýevtar atyndaǵy Memlekettik sırkiniń» dırektory Sergeı Rastorgýev, Ýkraına Memlekettik sırk kompanıasynyń dırektory ári kórkemdik jetekshisi Sergeı Kabakov, «Sırk artıseriniń asosıasıasy» qoǵamdyq uıymynyń múshesi-quryltaıshysy Lolıta Lıpınska, Túrkmendik sırk dırektory Ilamanov Annamýhammed, Qazaq Memlekettik sırkiniń dırektory – kórkemdik jetekshisi, mádenıettanýshy Baqyt Bókebaev jáne «Ońtústik-Sırk» bas dırektory Arman Álıev bar.
Festıválge qurmetti qonaq retinde Vengrıadan tanymal pil úıretýshi Rıchard Takas pen Ýkraınadan shoý-baǵdarlamalardyń jetekshisi Vıktorıa Grısenko shaqyryldy.