Qazaqstanǵa kelin bolyp túsken reseılik Anna qazaq otbasyna ábden sińisken. Vladıvostokta týyp-ósip, Japonıada jumys istep, búginde qazaq jigitiniń baǵyna aınalǵan arý Facebook jáne Instagram paraqshalarynda «orys kelin» degen atpen tanymal. Jelide basynan ótken túrli oqıǵalardy baıandap otyratyn ol orystardyń toıy jaıly da birer sóz jazypty. Atalmysh jazbasy arqyly qazaq ultynyń joǵary mádenıetin kórsetkisi kelgen bolar degen oımen Qamshy.kz aqparat agenttigi saıtta jarıalaýdy jón kórdi.

«Kelesi tilek kúıeý jigittiń aǵasyna berildi: «Bizdiń Sereja bala kúninde júırik edi, tez júgiretin. Birde qulap qalyp, tizesin jaralap aldy. Jylady... ASHSHY... ». Anasy Serejany aıap, oǵan sý berdi. Alaıda bótelkelerdi shatastyryp alǵan bolýy kerek, araq quıyp jiberipti. Sereja iship aldy da... «Ashshy!». Sereja ábden qyzyp alǵan. Ár «ashshy» saıyn jastardyń bir-birine degen qushtarlyǵy da sónip barady. Kelesi tilekte jaı ǵana «chmok» boldy. İshki uıatym oıanyp barady.

Tilek aıaqtalǵan soń tamada sóıledi: «Jastardyń qushtarlyǵyn-aı, sál sýytpasa bolmas. Erkekter qaýymy syrtqa shyǵyp demalyp qaıtsyn», - dedi de, ketip qaldy.

Ekinshi ústel bastalyp, oıyndarǵa kezek keldi. Bireýiniń belinde qaryndash, ekinshisinde bótelke baılanǵan. Shart boıynsha álgi qaryndashty bótelkege kirgizý kerek. Endi biri apelsındi qoldyń kómeginsiz ekinshi adamǵa berý kerek. Seriginiń kózi baılaýly tur.

«Jastardyń ómiri jeńil bolsyn desek, eneler qushaqtaryńdy ashyńdar», - dep edi tamada, quda-qudaǵılar qushaqtasa jóneldi. «Jar-jardyń» ornyna Alegrovanyń «Svadebnye svety» áni oryndaldy. «Qyzyl órik» pen «Aspanǵa qaraımynnyń» ornyna halyq Serdúchkanyń ánderine sekeńdep bılep júr. Bir er adamnyń otyryp bılegenine qarap, kóz aldyma «Qara jorǵa» bıi elestedi.

Toıbastar taratýdyń ornyna kók jáne qyzǵylt jórgekke aqsha jınady. Jórgektegi jınalǵan aqshaǵa qarap, jastardyń birinshi balasynyń jynysyn anyqtamaq boldy. Qalyńdyqtyń ishine qarasańyz, birneshe aptadan keıin-aq balasynyń jynysyn ÝZI arqyly da anyqtap alýyna bolatyndaı.

Toıdan soń qalyńdyqtyń aıaq kıimin urlap ketti, keıin ózin de alyp qashty. Biraq kúıeý jigittiń úıine emes, shylym tartatyn orynǵa aparyp, biraz ustady. Kúıeýi jigittiń dosy qalyńdyqty qaıtaryp alý úshin, strıptız bıledi.

Qalyńdyq gúl laqtyrdy, endi kúıeý jigittiń de kezegi keldi. Ol jip laqtyrý kerek (batystyń áseri). Kúıeý jigit qalyńdyǵynyń beldemshesin kóterip, tisimen kók jipti sheship jatyr. «Qasqaaaa, qaı betimdi shymshıyn» dedim ishimnen, ózim yzadan jarylyp keterdeı turmyn. Al kúıeý jigit álgi jipti dostaryna laqtyryp jiberdi.

Toı bitken soń dastarhandaǵy tamaqty daıashylar túgel jınap aldy. Úıge sarqyt alyp baram degen úmitim úzildi. Et asylmady, sútpen shaı ishilmedi.

Jastar tort kesti, sosyn bir-birine jegizdi.

Toı tóbelessiz ótpedi. Kúıeý jigittiń jaqyn dosy týystardyń birimen sózge kelip, syrtqa shyǵyp ketti.

Jastar toıyna tek eń jaqyndaryn shaqyrdy».