Maqtaaral aýdanynda jańa oqý jylynda 8 bilim uıasy el ıgiligine beriletin bolady.  Budan bólek bıyl  8 mekteptiń irgetasy qalanbaq. Sondaı-aq,  aýdanda 5 modýldi medısınalyq trektiń qurylysy aıaqtalýǵa jaqyn. Bul týraly aýdan ákimdiginde ótken jıynda óńir basshysy Jamantaı Beısenbaev málim etti.

Jıyn barysynda aýdandyq sáýlet, qala qurylysy jáne qurylys bóliminiń basshysy Sansyzbaı Seıdalıev baıandama jasady. Onyń aıtýynsha, 8 bilim oshaǵyndaǵy qurylys jumystary kestege saı júrgizilýde. Bıyl Jetisaı qalasyndaǵy 80 gektar aýmaqta 5 qabatty 60 páterli turǵyn úılerdiń qurylysy bastaý alatyn bolady. Budan bólek 4 qabatty 12 turǵyn úıdiń barlyq qujattary oblystyq qurylys basqarmasyna ótkizilip qoıǵan.

Aýdannyń bas arhıtektory Dostyq jáne Jambyl aýyldyq okrýgi ákimdiginiń jańa ǵımarattary  men 5 modýldi medısınalyq trekterdiń de qurylysy aıaqtalǵaly jatqanyn habarlady.

Aýdan ákimi Jamantaı Beısenbaev jańadan salynyp jatqan mektepterdiń jylý júıesin kómirden bólek,  gazǵa da qosa alatyndaı etip jasaýdy tapsyrdy.  Óıtkeni 2020 jylǵa deıin aýdan eldi mekenderi tolyqtaı gazben qamtylatyn bolady. Sondaı-aq, aýdan basshysy kúrdeli jáne orta jóndeýden ótip jatqan mektepterge baqylaýdy kúsheıtýdi tapsyrdy.

"Balalar - bizdiń bolashaǵymyz. Biz mektep salýdy toqtatpaýymyz kerek. Jańadan jobalyq-smetalyq qujattardy ázirlep,  eski mektepterdiń qataryn azaıtýymyz kerek",  - dedi Jamantaı Qanaıuly.

Aýdanda 8 aýyldyq okrýgte mádenıet úıleri joq ekenin tilge tıek etken óńir basshysy sońǵy jyldary mádenıet salasyna az kóńil bólinip jatqandyǵyn aıtty. Mádenıet úılerin salý úshin de jobalyq-smetalyq qujattar ázirlep,  salalyq basqarmaǵa usyný kerektigin eskertti.