Oral qalasyndaǵy №2 sot ǵımaratynda jýyrda ashylǵan medıasıa kabıneti óz jumysyn júıeli jalǵastyryp keledi.
– Búginde elimizdegi sot júıesindegi reformalardyń birden-bir kórinisi medıasıa rásimderiniń júrgizilýi bolyp tabylady. Daýlardyń medıasıa arqyly sheshilýiniń máni men mańyzyn arttyrý barysynda tatýlasý kabıneti ashylyp otyr. Bul kabınette tatýlasýǵa jatatyn talap-aryzdar boıynsha daýlasýshy eki jaqty bes kún ishinde kelisimge keltirýge barlyq múmkindik qarastyrylady. №2 sot oblystaǵy jalpy azamattyq isterdiń 75 paıyzyn qaraıdy. Iaǵnı tórt istiń úsheýi osynda qaralady. Qalǵan tórt istiń bireýi aýdandyq sottardyń enshisinde. Olardyń barlyǵy derlik, ıaǵnı 50 paıyzdan astamy medıasıalyq kelisim, bitimgershilik kelisim arqyly jáne sot medıasıamen sheshilip jatyr, – deıdi BQO sotynyń tóraǵasy Bek Ámetuly.
Tatýlasý kabınetine tatýlastyrýshy sýdıa retinde Altyn Aıtýarova taǵaıyndalǵan bolatyn. Bul kabınette ajyrasýǵa, múlikti bólisýge, turmystyq jáne eńbek daýlaryn sheshýge arnalǵan azamattyq isterge qatysty eki taraptyń talap-aryzdary qaralatyn bolady. Eki aıǵa deıin sozylatyn sot talqylaýyna qaraǵanda, sotqa deıingi tatýlasý taraptarǵa sotta áýre-sarsańǵa túspeýge, ýaqytty jáne sotqa júginýge baılanysty shyǵyndardy únemdeýge múmkindik beredi. Ásirese, ózara kelisý arqyly eki taraptyń tatý qarym-qatynasy saqtalatyn bolady.
– Joǵary sot tóraǵasynyń ókimimen tatýlastyrý rásimi boıynsha pılottyq joba qolǵa alynǵan edi. Bul tatýlas kabıneti óz jumysyn aǵymdaǵy jyldyń 10 mamyry kúni bastaǵan bolatyn. Osy aralyqta meniń qaraýyma 68 azamattyq is túsip, 13 is medıasıa arqyly sheshildi. Men №2 qalalyq sotqa túsken azamattyq isterdi qaraımyn. Sotqa túsken aryzdy sot óndirisine qabyldanbastan buryn bes jumys kúni ishinde tez ári eki taraptyń ózara kelisimimen sheshýim qajet. Joǵaryda qaralǵan isterdi sanattarǵa bólip aıtsaq, segizi ajyrasý jónindegi talap-aryz, ekeýi jol-kólik oqıǵasy boıynsha keltirilgen zıandy óndirip alý, bireýi ar-namysty qorǵaý jáne ekeýi qaryzdy qaıtaryp alý jónindegi ister boldy, – deıdi №2 Oral qalalyq sotynyń sýdıa-medıatory Altyn Aıtýarova. .
Tatýlasý kabıneti oblysymyzdaǵy medıatorlardyń ózara tájirıbe almasyp, oı bólisetin ádistemelik ortalyq retinde de qyzmet etetin bolady.
