Keshe Bas prokýratýrada Qaırat Qojamjarovtyń qatysýymen ótken alqa otyrysynan keıin jaqsy jańalyqty estip qýanyp qaldyq. Qazaqstandaǵy Elbasynyń jarlyǵymen 5000-ǵa jýyq adam túrmeden bosatylýy múmkin degen aqparat tarady.
Esterińizge sala ketsek osyǵan deıin Qamshy.kz aqparat agenttigi tar qapasta kún keshken qoǵam belsendileri týraly birneshe ret jazǵan bolatyn. Kezinde bılik orysqa táýeldi bolyp talaı qazaq zıalysy tar qapasqa qamalsa, qazirgi bılik «demokratıalyq elmiz», - dep maqtana otyra, óz oıyn ashyq bildirgen, ulttyq múdde úshin kúresken azamattardy túrmeden bir-aq shyǵardy. Bıyl birneshe belsendi azamattar túrmeden bosap, otbasymen qaýyshty. Olardyń tizimin Qamshy.kz aqparat agenttigi tilshisi sanamalap, oqyrman nazaryna usynady.
Talǵat Aıan
2016 jyly 28 qarashada Atyraý qalasynda jer úshin mıtıńige shyqqan Talǵat Aıandy 5 jylǵa bas bostandyǵynan aıyrǵan bolatyn. Talǵat Aıanǵa birqatar qylmystyq baptar (sonyń ishinde “alaýyzdyq týdyrý”, “zańsyz mıtıń uıymdastyrý”) boıynsha aıyptary taǵylǵan. Alaıda azamattyq belsendi bul aıyptardyń eshqaısysyn moıyndamady. Araǵa 2 jyl salyp, bıyl Talǵat Aıan shartty túrde erkindikke shyqty. 28 sáýirde Aqtóbe qalasyndaǵy túrmeden bosap shyqqan Talǵat Aıandy otbasy, týystarymen qatar belsendiler de «Talǵat – batyrymyz!», - dep qarsy alǵan bolatyn.
Saıat Ybyraı
2011 jyly qazan aıynda mehanıka men mashına jasaý salasynda halyqaralyq 5 patenttiń ıegeri, 3 ǵylymı monografıa men 60-tan astam ǵylymı zertteýlerdiń avtory Saıat Ybyraı 12 jylǵa bas bostandyǵynan aıyrylǵan bolatyn.
Bıyl 11 sáýir kúni Óskemende Shyǵys Qazaqstan oblystyq sotynyń appelásıalyq alqasy 12 jylǵa sottalǵan ǵalym, profesor Saıat Ybyraıdy shartty túrde merziminen buryn bosatý týraly ótinish qarap, ony qanaǵattandyrý týraly sheshim shyǵardy.
Seıitqazy Mataev
2017 jyly Qazaqstan jýrnalıser odaǵynyń tóraǵasy Seıtqazy Mataev «qarjylyq qylmysqa qatysy bar» degen aıyppen túrmege toǵytylǵan bolatyn. Araǵa bir jyl salyp 2018 jyly qarashada sot Seıitqazy Mataevty merziminen buryn shartty túrde bosatý týraly sheshim shyǵardy.
Halyq áli de qazaq úshin eńbek etken qoǵam belsendileriniń aldaǵy ýaqytta bıliktiń «meıirimine» bólenip, azattyqqa shyǵatynyna senip, úmit úzbeıdi. Elbasynyń Jarlyǵymen 5000 adam bostandyqqa shyǵady degen aqpardan keıin Aron Atabektiń, Maks Boqaevtyń, Muhtar Jákishevtiń sol «baqyttylardyń» qatarynan kóremiz degen úmitimiz joq emes. Qamshy.kz aqparat agenttigi táýelsiz eldiń túrmesinde otyrǵan qoǵam belsendileriniń tizimin taǵy da oqyrman nazaryna usynady.
Aron Atabek
12 jylyn túrmede ótkizgen tirkelmegen «Alash» ulttyq táýelsiz partıasynyń tóraǵasy Aron Atabek áli kúnge deıin tar qapasta ómirin ótkizýmen, ádildikti kútýmen keledi. 1986 jyly Jeltoqsan kóterilisine qatysyp eki jyl boıy qýǵynǵa ushyrasa, Táýelsizdik alǵannan keıin 18 jyl bas bostandyǵynan aıyryldy. Onyń jaza merzimi 2024 jyly aıaqtalady.
Maks Boqaev
Iá, 2016 jylǵy jer kóterilisinen keıin Maks Boqaev pen Talǵat Aıannyń aty birge atalyp keledi. Alaıda bıyl Talǵat Aıannyń shartty túrde bostandyqqa shyǵyp, Maks Boqaevtyń áli kúnge deıin túrmede jatqany túsiniksiz. Osyndaıda Talǵat Aıanǵa kórsetilgen «qaıyrymdylyqtyń» Maks Boqaevqa kelgende nege kórsetilmedi degen zańdy suraq týyndaıdy.
Aıta ketetin bolsaq, Maks Boqaev ta Talǵat Aıan sekildi 5 jylǵa bas bostandyǵynan aıyrylǵan bolatyn.
Muhtar Jákishev
1998-2009 jyldar aralyǵynda «Qazatomprom» ulttyq kompanıasyn basqarǵan Muhtar Jákishev 2009 jyly qamaýǵa alynady. 2010 jyly 12 naýryzda Muhtar Jákishevti Astanadaǵy aýdandyq sot 14 jylǵa bas bostandyǵynan aıyrady. Oǵan Venada «Qazatomprom» kompanıasynyń zańsyz ókildigin paıdalanyp qosymsha paıda tapty, astyrtyn kasa ustady degen aıyp taǵyldy.
Aıta ketetin bolsaq, Muhtar Jákishev qamalǵanǵa deıin óziniń attasy Muhtar Áblázovty túrmeden bosatýdy surap, kepil bolyp júrgen.
