Almatyda Respýblıkalyq "KAZBILIM" ortalyǵynyń fılıaly ashyldy, dep habarlaıdy Qamshy.kz aqparat agenttigi. Bul týraly ortalyq dırektory Aıatjan Ahmetjanuly óziniń Facebook paraqshasynda málimdedi.
"Al, qýanyshty habar! Almatylyq dostar, ata-analar! Bul jolǵy saparymnyń úlken bir maqsaty sátti bastaldy. Alla qalasa, tamyz aıynan bastap respýblıkalyq Qazbilim Ortalyǵynyń Almaty fılıaly óz jumysyn bastaıdy. Ata-analardyń ótinishi men shákirtterdiń suranysyna oraı osyndaı qadamǵa aıaq bastyq.
Almaty qalasy Áýezov aýdany Abaı kóshesi men Jumaǵalı Saın kósheleriniń qıylysynda "KAZBILIM" ortalyǵy ofısin alyp, daıyndyq jumystary júrgizilip jatyr!
18.08.2018 jyly 11:00 de ashylý saltanatynda jolyǵaıyq!
Bıyl Respýblıkalyq "KAZBILIM" ortalyǵynda tyń jańalyqtar, jańa jobalar bar. Bizdiń ata-analar men shákirtterdi tamyz aıynda tosyn syılar kútip tur", – dep jazdy Aıatjan Ahmetjanuly.
Aıta keteıik, 2013 jyldan beri urpaq tárbıesi men bilimine úzdiksiz ún qosyp kele jatqan «Qazbilim» portalynyń ujymy qazaq balasynyń erteńgi básekege qabiletti ult tulǵasy bolyp jetilýi úshin ulttyq tárbıeni ózek etken baǵdarlamalar negizinde Respýblıkalyq "KAZBILIM" ortalyǵy bolyp qurylyp, 2016 jyly aqpan aıynda jumysyn bastady. Ortalyq eki baǵytta qyzmet atqarady:
- Bilim berý
- Aqparattandyrý
Qazir ortalyqtyń 3 oqý ǵımaraty, 25 dárisqanasy jáne jeke kitap dúkeni bar. Ortalyqta 50-den astam muǵalim bilim beredi.
