Madrıdte Ispanıa Mádenıet mınıstrliginiń qoldaýymen qazaq ádebıeti jınaqtaryn ıspan tiline aýdarý, basyp shyǵarý jáne ilgeriletý jobasynyń áleýmetti qatysýshylarymen kelissózder aıaqtaldy.
«Rýhanı jańǵyrý» baǵdarlamasy aıasynda júzege asyrylatyn osynaý qazaqstandyq bastamaǵa Ispanıanyń Mádenıet mınıstrligi strategıalyq seriktes bolsa, joba keńesshisi retinde «Servantes ınstıtýty» bekitilgen. Birqatar iri ıspandyq basylymnyń usynystaryn qarap, sonymen qatar strategıalyq seriktestik usynysymen qazirgi qazaq ádebıetiniń 2 antologıasyn ıspan tiline ádebı aýdarý, basyp shyǵarý jáne taratý boıynsha jumystardyń negizgi operatory retinde «Visor-Libros» baspa úıi belgilenip otyr.
Sáıkesinshe memorandýmǵa ıspan astanasyndaǵy Qazaqstan Elshiliginde qol qoıyldy. Qujatty «Rýhanı jańǵyrý» baǵdarlamasyn júzege asyrý jónindegi ulttyq komısıanyń hatshysy Aıda Balaeva men baspa úıiniń prezıdenti Hesýs Garsıa Sanches rásimdedi. Sharaǵa Qazaqstannyń Ispanıadaǵy Elshisi Konstantın Jıgalov pen «Ulttyq aýdarma búrosynyń» dırektory Raýan Kenjehanuly qatysty.
«Visor-Libros» sheteldik ádebıetpen jumys isteıtin mamandandyrylǵan baspa sanalady. Baspa redaksıasy álemniń 10-nan astam eliniń aqyn-jazýshylarynyń shyǵarmalaryn aýdarý, basyp shyǵarý jáne ilgeriletýde kóp jyldyq tájirıbege ıe. Sonymen qatar bul baspa Latyn Amerıkasy ederi men Soltúsik Amerıkanyń ıspan tildi halyqtarynyń arasynda keńinen tanymal. Qazaqstanmen yntymaqtastyq aıasynda baspa Ispanıadan tysqary jerde de qazaq ádeıetiniń antologıasyn taratýǵa qatysatyn bolady. Aıta keterligi, ıspan tili tek Ispanıada ǵana emes, sonymen qatar Latyn Amerıkasynyń 18 eliniń halqy úshin de ana tili sanalady. Bul tilde álemde 600 mıllıonnan astam adam sóıleıdi.
Ispandyq baspagerlermen kezdesý barysynda Aıda Balaeva: «Bizder úshin ıspandyq oqyrmannyń jan-júregine deıin jetetindeı aýdarmanyń joǵary sapasyn qamtamasyz etý mańyzdy. Shyǵarmashylyq ujymdarymyzdyń birlesken jumysy qazaq pen ıspan mádenıetin odan ary jaqyndata túsýge, elderimiz arasyndaǵy qarym-qatynasty nyǵaıtýǵa kópir bolady», - dedi.
Qazirgi qazaq ádebıetin BUU-nyń 6 tiline aýdarý jumystary «Jahandyq álemdegi qazirgi qazaq mádenıeti» jobasy aıasynda júzege asyrylýda. Joba aıasynda qazirgi qazaq ádebıetiniń eki antologıasy ıspan tiline aýdarylatyn bolady. Olar: «Qazirgi qazaq poezıasynyń antologıasy» men «Qazirgi qazaq prozasynyń antologıasy». Árbiri shamamen 500 betten turatyn antologıalarǵa 60 qazaqstandyq avtordyń shyǵarmasy engizilgen.
