Búgin Almaty oblysy Eńbekshiqazaq aýdany Jarkent qalasyndaǵy Panfılov aýdandyq sotynda "shekarany zańsyz kesip ótti" degen aıyp taǵylǵan Saıragúl Saýytbaıdyń soty bastaldy. 

Bıyl 21 mamyrda Saıragúl Saýytbaıdy Ulttyq qaýipsizdik komıtetiniń qyzmetkerleri Almaty oblysy Eńbekshiqazaq aýdany Báıdibek bı aýylyndaǵy úıinen tańǵy 9.00-9.30 shamasynda ustap áketken. Oǵan QR Qylmystyq kodeksiniń 392-baby 1-bólimi boıynsha aıyp taǵylyp (shekarany zańsyz kesip ótý), sodan beri qamaýda otyr. 

Dúısenbi 9 shilde kúni Saıragúl  Saýytbaıdyń alǵashqy sot otyrysy ótken. Sot otyrysynda áıeldiń advokaty Abzal Quspan orys tilinde ótip jatqan sot isiniń qazaq tilinde júrgizilýin talap etti. Sýdıa Dınara Tutqabaeva aıyptalýshy jaqtyń talabyn qanaǵattandyrdy. İs qaǵazdaryn qazaq tiline aýdaryp, Saıragúlge túsinikti arab harpine kóshirý úshin 12 shildege deıin merzim belgiledi. Ári sot otyrysyn búginge bekitken. 

Buǵan deıin qazaqstandyq advokat Abzal Quspan shekarany zańsyz kesip ótti degen etnıkalyq qazaq Saıragúl Saýytbaıdyń isine qatysty tergeý jumystarynyń barysymen tanystyryp ótken bolatyn.

Abzal Quspan munda áıeldiń zańsyz áreketinen buryn maqsaty negizge alynatynyn aıtqan.  Al dúıim jurtqa málim Saıragúldiń maqsaty – óz otbasyna asyqty. Tek Qytaı tarapy onyń qujattaryn belgisiz sebeptermen tartyp alǵan.

"Saıragúl alańdap otyr. Qazaqstannyń túrmesinde otyrsam da, osynda qalsam boldy", - dep jetkizgen edi advokat áıeldiń sózin.

Buǵan deıin Saıragúldiń ómirine arasha túsken qazaqstandyqtardyń sanynda shek bolmady. Respýblıkanyń ár aýdanynan "Saıragúlge arasha!" atty vıdeo taralyp, bıliktiń qulaǵyna jetkizýge tyrysyp baqty. Saıragúldi Qytaıǵa qaıtarǵan jaǵdaıda ólim jazasyna kesiletinin áıeldiń otbasy da, halyq ta bilip otyr. Bar úmit qazaq sotynda!