" "Meni jaqsy kóresiń be?"
- "Jaqsy kóremin, balam".
-"Qatty jaqsy kóresiń be?"
-"Qatty-qatty jaqsy kóremin".
-"Óte-óte?"
-"Óte-óte".
Jeti jasar ulym "jaqsy kóresiń be?" dep kúnine onshaqty ret suraıtyn shyǵar? Jaýabym daıyn. Ony júz ret bolsa da, myń ret bolsa da qaıtalaı alamyn. Qysqasy, ulym arqyly jaqsy kórýdi qaıtadan úırenip jatyrmyn.
Anam jaryttyqtyń maǵan degen maxabaty erekshe-tuǵyn. Basqa balalarynan bólek súıdi, meni. Ózi toqsanǵa, men elýge tolsam da aınalyp-tolǵanyp otyratyn. El-jurttyń kózinshe bolsa da óbekteı beretin. Buǵan kádimgideı qysylýshy edim, "Ógizdeı boldym, apa, qoıshy endi" dep. Aqymaq ekenmin aý?!
Myna dúnıede ana meıiriminen artyq ne bar? Ana qushaǵynan ystyq ne bar? "Apa, sizdi jaqsy kórem" dep nege jıi aıtpadym, kózi tirisinde? Jaqsy kóretinimdi sezimtal júregimen ózi uǵar dep oılasam kerek. Keıde, anamnyń altyn maxabatyn jetkilikti baǵalamadym ba dep te qapalanam.
Ol kisi (byltyr) ekinshi mamyr kúni 90 jasqa tolyp, on altynshy mamyr kúni ómirden ozdy. Tap-taza júrip, tap-taza ketti. Marqum tósek tartyp ta jatpady. Júrekten ketedi dep oılamappyz. Sońǵy eki-úsh jyldyń ishinde (aldyma túrli kedergiler shyǵyp), joq jerden paıda bolǵan problemalarmen alysyp ketken edim. Ony úı ishindegilerge bildirmeýge tyrystyq. Biraq, ana júregi bárin sezedi ǵoı. Men úshin talaı tańyn uıqysyz atyrǵan da bolar? Keıde oılaımyn, ishinen tynǵan sary ýaıymy júregin shydatpady ma dep.
Dúnıeden erte ketti dep kúıinetin jaı joq. Allanyń isine amal ne? Qoshtasa almaı qalǵanyma, aýyr eńbekten kústengen qolyn qushyrlana súıip, oǵan degen perzenttik maxabatymnyń sheksizdigin jetkize almaı qalǵanyma ishteı ókinemin. Ókingennen ne paıda? Bári kesh...
Muny beker jazyp otyrǵanym joq. Jaqyndaryńdy jaqsy kórińizder degim keledi. Jaqsy kóretinińderińizdi jasyrmańyz degim keledi. Jaqsy kóretinderińizdi aıtýdan jalyqpańyzdar degim keledi.
Myna beınesyrdyń ıesi - Amır (Ámir) Qaraqulov, kınorejısser. Ekeýmiz KazGý-diń jýrfagynda (birinshi kýrsta) birge oqyǵanbyz. Ol keıin Máskeýge (VGIK-ke) aýysty, biz ásker qataryna attandyq.
Amırdiń (Ámirdiń) áńgimesin aıaǵyna deıin tyńdańyz. Oıymyz bir jerden shyǵyp jatqan soń, ózderińizben bólisýdi jón kórdim" deıdi Serik Abas-SHah.
