Otyrar aýdanynda Túrkistan oblysynyń ákimi Túımebaev Janseıit Qanseıitulynyń qatysýymen zıaly qaýym ókilderi, tarıhshy-arheologtar jáne sáýlet, qurylys salasy mamandarynyń kóshpeli jıyny ótti.
Eń áýeli Otyrar aýdanynyń ákimi Erlan Aıtahanov mártebeli meımandarǵa Arystanbab kesenesi men «Otyrartóbe» tarıhı orny mańyndaǵy abattandyrý, kógaldandyrý jumystarymen tanystyrdy.
«Otyrar – qazaq órkenıetiniń altyn dińgegi» dep Elbasy Nursultan Ábishuly baǵasyn bergen aýdannyń qatpar-qatpar qoınaýynda ǵasyrlardyń búkken syrlary men tarıhy urpaqqa kózdiń qarashyǵyndaı saqtap, tereń uǵynýy tıis amanat ekendigi anyq.
Osy oraıda ótkeni kóneden tamyr tartqan Otyrardyń kúlli musylmanǵa ortaq otyz myńnan asa tarıhı murasy jınaqtalǵan «Otyrar memlekettik arheologıalyq qoryq-mýzeıi» kúrdeli jóndeýden ótip, týrıserge qaltqysyz eńbek etýde. Atalǵan nysandy aralap kórgen aımaq basshysy týrızm salasyna jan bitirýdi ári qaraı da jalǵastyrý kúnniń basty mindeti ekendigin jetkizdi.
Jıynǵa qatysýshylar oblys ákiminiń bastamasymen qolǵa alynǵan «Týǵan jerdi túletý perzenttik paryz» aksıasy aıasynda «Bilál ata» balabaqshasynyń saltanatty ashylýyna qatysty. Otyrar aýdanynyń ákimi E.Aıtahanovtyń uıymdastyrýymen aksıaǵa belsene azamattyq qoldaý kórsetken otyrarlyq kásipker - Serik Namaev. Memlekettik-jekemenshik áriptestik aıasynda 100 mln. teńgege 100 oryndyq balabaqsha salyp, el ıgiligine berdi. Balǵyn balalardy zor qýanyshqa keneltken mektepke deıingi mekemeniń lentasyn saltanatty túrde oblys ákimi Janseıit Qanseıituly qıyp, Otyrar halqynyń uıymshyldyǵy men atqarǵan isterine alǵysyn bildirdi.
Sapar barysynda oblys ákimi Sháýildir aýylyndaǵy gaz tartý júıeleriniń qurylys jumystarymen tanysty. Otyrar aýdanynda aǵymdaǵy jyl - kógildir otynmen qamtamasyz etý jyly dep atalǵan. Osy maqsatta Otyrar aýdanynyń 34 eldi mekenin gazdandyrý isi josparlansa, bıyl Sháýildir jáne Temir aýyldarynda qurylys jumystary kestege sáıkes qarqyndy júrýde. Sonymen qatar Sh.Qaldaıaqov, Eski Shilik, Jańa Shilik jáne Aqtóbe eldi mekenderin gazdandyrý jumystaryna qarjy qaralyp, qurylys jumystary taıaýda qarqyn almaq. Al, Syrdarıanyń sol jaǵalaýyndaǵy 12 eldi mekendi gazdandyrýǵa jobalyq smetalyq qujatyn daıyndaý úshin sáýlet-josparlaý jumysy daıyndalyp, oblystyq búdjetke usynyldy.
Sonymen qatar oblys basshysy Elordamyz Astana qalasynyń 20 jyldyǵy mereıli merekesine tartý retinde Temir aýyl okrýginde 1 balabaqsha men 1 mádenıet úıiniń paıdalanýǵa berilgen is-sharalaryna qatysty.
Óńir basshysy Shilik aýylyndaǵy «Nur Shilik» aýyl sharýashylyq kooperatıviniń de tynys-tirshiligimen tanysty. Atalmysh kooperatıv sút óńdeý isin jolǵa qoıyp, kásibin damytý úshin «Yrys» mıkro qarjy uıymynan 16,0 mln teńge alǵan. Kúnine 500 lıtr sút ónimderin daıyndaıtyn kásipkerlik nysanda 300 bas sıyr, 2256 bas ýaq mal, 217 bas túıe bar.
Oblys ákimi Otyrar aýdanyna jasaǵan issaparynda atqarylǵan sharýalarǵa oń baǵasyn berdi.
