Túrkistan oblysynyń ákimi Janseıit Túımebaev asqaraly 60 jasqa toldy. Ol kisiniń qyzmettik ómir joly kópshilikke tanys, degenmen osy oraıda oqyrman nazaryna onyń týyp-ósken ortasy, otbasy jóninde jáne basqa da keıbir derekter týraly aıta ketýdi jón kórdik.
Janseıit Qanseıituly Túımebaev 1958-jyly 8-shildede sol kezdegi Shymkent oblysynyń Alǵabas aýdanyna (qazirgi Túrkistan oblysy, Báıdibek aýdany) qarasty Qaınar aýylynda, kópbalaly otbasynda ómirge kelgen.
J.Túımebaevtyń ákesi Qanseıit Túımebaev kezinde Alǵabas jáne Sozaq aýdandarynda partıa uıymynyń hatshysy qyzmetin atqarǵan. Ol kisi qudaı qosqan qosaǵy Ulmeken Jamanqulqyzymen otbasynda 4 ul, 8 qyz tárbıelep ósirgen.
Qanseıit Túımebaevtyń úlken uly Baıseıit kezinde Mańǵystaý oblysynda jaýapty qyzmetter atqarǵan, keıin Shymkent oblystyq, Ońtústik Qazaqstan oblystyq ákimdikterinde eńbek etken. Ońtústik Qazaqstan jáne Almaty oblystarynda tabıǵı monopolıalardy retteý, básekelestikti qorǵaý jáne shaǵyn bıznesti qoldaý departamentin basqarǵan. Báıdibek aýdanynyń ákimi bolǵan.
J.Túımebaevtyń týǵan inisi Imangeldi búginde aımaqtyq basqarmalardyń birinde jaýapty qyzmet atqarady. Oǵan deıin Báıdibek aýdany ákiminiń orynbasary bolǵan.
Janseıit Túımebaev jubaıy Janat Eńsebaevamen birge Eldana jáne Elnar esimdi ul-qyzdar ósirgen. Keı derekterge qaraǵanda, J.Eńsebaeva óner galereıasynyń dırektory bolyp isteıdi, kezinde ol Túrkıadaǵy elshilikpen birigip, qazaqstandyq úzdik sýretshilerdiń «Zamanaýı qazaq óneri» atty kórmesin ótkizgen.
J.Túımebaev bala kezinde Shymkenttegi №12 mektep-ınternatta oqyǵan. Ony altyn medalmen bitirgen. Onyń matematıka pánine qabileti joǵary bolypty. Ol keıin Qazaq Memlekettik ýnıversıtetin, Máskeý Memlekettik áleýmettik ýnıversıtetin bitirgen. Búginde fılologıa ǵylymdarynyń doktory, profesor, 2-synypty elshi dıplomatıalyq dárejesiniń ıegeri. Ol kisi – 30-dan astam ǵylymı-tanymdyq kitaptardyń avtory.
J.Túımebaev kezinde Qazaq Memlekettik ýnıversıtetinde eńbek etken. 1993-jyldan bastap Syrtqy ister mınıstrliginde jaýapty qyzmetter atqarǵan, Qazaqstannyń Stambýl qalasyndaǵy konsýldyǵyn, Qazaqstan Prezıdentiniń Protokolyn basqarǵan, Prezıdenttiń keńesshisi bolǵan. Bilim jáne ǵylym mınıstri bolǵan. Reseıdegi, Túrkıadaǵy, Albanıadaǵy Tótenshe jáne Ókiletti elshi qyzmetterin atqarǵan.
Ol Ońtústik Qazaqstan oblysynyń ákimi qyzmetine 2016-jyly qazan aıynda taǵaıyndalǵan bolatyn. Bıylǵy 20-maýsymda jańadan qurylǵan Túrkistan oblysynyń ákimi qyzmetine taǵaıyndaldy.
D. Nurpeıis
"Zamana" gazeti
