Dımash Qudaıbergen Belarýsıa tórinde «Slaván bazary - 2018» halyqaralyq festıvalinde shyrqaǵan ánderi reseılik «RTR» men «MIR» telearnasynyń efırinen alynyp tastaldy, dep jazady Qamshy.kz aqparat agenttigi. Mundaı jaǵdaı buǵan deıin de bolǵan. Byltyr Dımash «Slaván bazary» baıqaýyna qonaq retinde baryp, án shyrqaǵan, alaıda Dımashty efırden qıyp tastap ánshiniń tyńdarmandarynyń shambaıyna tıgen edi. Bıyl dál sondaı jaǵdaı qaıtalanǵannan keıin Dımashtyń tyńdarmandary únsiz qalmaı Dımashtyń ónerin telearnalardan tamashalaý quqyǵyn talap etpek.
«MIR» telearnasynan bólek, «RTR» arnasy da Dımashty efırden alyp tastaǵan. Dımashtyń Reseıde tyńdarmandary kóp ekenin eskersek, atalmysh telearna basshylyǵy kórermenderdiń qalaýyn eskermegeni baıqalady. Dımashtyń tyńdarmandary «MIR» telearnasynyń áreketin múlde túsinbeı otyr. Sebebi atalǵan arna TMD elderinde habar taratady. Onyń ishinde Qazaqstan da bar. Dımashtyń fanattary «Qazaqstanda otyryp qazaqstandyq ánshiniń ónerin telearnadan kóre almasaq, Qazaqstanda habar taratatyn telearna mádenı jańalyqtardy tolyq bermeıtin bolsa mundaı arnanyń bizge qandaı qajeti bar?» dep otyr.
«Dımash dostar» atty fanklýbtyń ákimshisi Madına Qurmanǵalıeva atalmysh jaǵdaıǵa qatysty tyńdarmandardyń josparymen bólisti.
- Qazir Dımashtyń fanattary aqyldasyp jatyrmyz, máseleni kóterip «MIR» telearnasynyń basshylyǵyna, QR Mádenıet jáne sport mınıstrligine hat jazbaqshymyz. Dımash endi tanylyp kele jatqan jas ánshi emes qoı, Azıa juldyzy. Ony kóptegen elde óz tyńdarmany bar. Ol jerde Dımashty jaqsy kóredi, ónerin joǵary baǵalaıdy. Qazir reseılik tyńdarmandar Dımashtyń efırden alynyp tastalýyna qatysty áleýlemttik jelide óz narazylyqtaryn bildirip jatyr. Dımashty efırden alyp tastaǵan prodúserler mıllıondaǵan tyńdarmandy ádemi, jandy daýystaǵy ónerdi tamashalaý quqyǵyn aıyryp otyr, deıdi Madına Qurmanǵalıeva.
Dımashtyń fanattary munyń astarynda las saıasat jatýy múmkin ekenin de joqqa shyǵarmaıdy. Olardyń oıynsha, eger Dımashty saıasat úshin efırden qıyp tastasa mundaı saıasat alysqa barmaıdy. Al saıasat bolmasa, ıaǵnı telearna qyzmetkerleriniń kásibıliginiń tómendigi dep baǵalap otyr. Sebebi Dımash Qudaıbergenniń óneri – tyńdarmanǵa estetıkalyq lázzat syılaıtyn, tyńdarman suranysyna ıe.
- Bul birinshi ret bolyp otyrǵan jaǵdaı emes. Byltyr da Dımash "Slaván bazaryna" qonaq retinde kelgen, «RTR» men «MIR» byltyr da bıyl da kórsetpedi. «RTR» - komersıalyq telearna. Onda festıváldyń qysqartylǵan nusqasyn kórermenge usyndy. Kóptegen ártisterdi alyp tastady. Onyń ishinde Dımash ta bar. Tek tanymal reseılik ánshilerdi ǵana qosqan. Al «MIR» telearnasy baıqaýdyń reseılik arna kórsetken qysqartylǵan nusqasyn ala salǵandaı kórindi, - deıdi Madına Qurmanǵalıeva.
Shildeniń 12-si men 16-sy aralyǵynda Belarýsıada ótken «Slaván bazary – 2018» halyqaralyq baıqaýyna álemniń túkpir-túkpirinen Dımashtyń fanattary ánshiniń ónerin tamashalaý úshin barǵan. Onyń ishinde reseılik tyńdarmandar da jeterlik. Madına Qurmanǵalıevanyń aıtýynsha, reseılik fanattar uıymdastyrý jumystaryna belsene atsalysqan.
- «Slaván bazary – 2018» baıqaýyna «Dımash dostar» atty Dımashtyń fan klýbynyń atynan 10 adam bardyq. Shetelden de fanattar keldi. Barlyǵymyz 80 adamdaı boldyq. Ózimiz jınalyp kesh uıymdastyrdyq. Reseıden kelgen fanattar óte kóp boldy. Olar bizge Dımashqa gúl alý, plakat jazý sekildi jumystardy uıymdatyrýǵa kómektesti. Dımashty efırden alyp tastasa da reseılikter ony Youtube jelisi arqyly jaqsy biledi, tanıdy, onyń ánderin tyńdaıdy, deıdi «Dımash dostar» fan klýbynyń ákimshisi.
Dımashtyń efırden alynyp tastalýyna qatysty aqyn Ońaıgúl Turjan da narazylyǵyn Facebook paraqshasynda jazǵan edi.
«Slaván bazarynda» Dımash Qudaıbergen óziniń ǵajaıyp ánshi ekendigin taǵy da dáleldegeni sonshalyq, onyń án aıtqan tusyn «RTR» men “MIR" telekanaldary qıyp tastapty. Óıtkeni bul atyshýly óner festıvaline Reseıdiń de mańdaıaldy ánshileri qatysqan edi. Solarǵa kóleńke túspesin degenderi me eken, a? Konsertti júrgizýshi de qatyrdy: "Dımash ız Kazahstana" dedi de, "Baskovqa gúl qalmaıtyn boldy ǵoı" dedi. Konsertti Lýkashenko da tamashalady. Onyń Dımashqa degen qurmeti erekshe», - dep jazdy aqyn.
Aıta keteıik, Belarýsıada 12 men 16 shilde aralyǵynda «Slaván bazary - 2018» halyqaralyq konkýrsy ótken bolatyn. Dımash balalarǵa arnalǵan konkýrsta qazylar alqasynyń múshesi boldy. «Slaván bazary - 2018» baıqaýyna Qazaqstannyń atynan 2-synyp oqýshysy Ábilqaıyr Jumabaı qatysyp, úzdik úshtikten kórinip, júldeli orynǵa ıe boldy.
Dımashtan bólek halyqaralyq baıqaýda Roza Rymbaeva da qazylyq etken. Ánshi eresekter arasynda baıqaýǵa qatysýshylardyń ónerine baǵa berdi. Festıválge elimizdiń atynan 23 jastaǵy Ernar Sadyrbaev qatysty. Ol halyq arasynda Ámire esimimen tanymal.
Belarýsıada Qazaqstannyń tanymal ánshisi Roza Rymbaevanyń esimi jazylǵan juldyz ornatyldy. Sonymen qatar, Belarýsıa prezıdenti Aleksandr Lýkashenko qazaqstandyq ánshige arnaıy syılyq tabystaǵan bolatyn.
