Elimizdegi densaýlyq saqtaý mekemelerindegi kompúterlendirý 88 paıyzdy qurady. Bul týraly búgin QR Densaýlyq saqtaý mınıstri Eljan Birtanov Úkimettiń keńeıtilgen otyrysynda málimdedi, dep jazady Qamshy.kz aqparat agenttigi digitalkz.kz saıtyna silteme jasap

Mınıstr elimizdegi densaýlyq saqtaý oryndaryndaǵy jappaı kompterlendirý máselesine de toqtalyp, ákimderge bul jumysty kúsheıtý kerektigin aıtty.

«Medısınalyq oryndardy kompúterlik tehnıkamen jaraqtandyrý jumystary júrgizilýde. Osy kórsetkish shamamen 88 paıyzdy qurady. Jergilikti atqarýshy organdardyń jabdyqtalýy 100 paıyzǵa jetkizýdi suraımyn», - dedi E. Birtanov.

Qazaqstandaǵy emdelýshilerdiń 14 paıyzy Elektrondyq Úkimet portalyn paıdalanady. Al, turǵyndarǵa kórsetiletin tegin dárigerlik qyzmet 600 mlrd teńgeni qurap otyr.

«Elimizdiń barlyq óńirlerinde eń mańyzdy aýrýlardy basqarý baǵdarlamalary engizilýde. Memlekettik qyzmetterdi elektrondyq qyzmet pen mobıldik qosymshalar arqyly kórsetýdiń qoljetimdiligin men qolaılylyǵyn arttyrý jumysy júrgizilýde. Mysaly naýqastardyń 14 paıyzy egov.kz arqyly jazylǵan», - dedi E. Birtanov.

Sondaı-aq, ol ulttyq dárilik qamtamasyz etý saıasatyn baıandap, únemdilik pen tıimdilik týraly sóz etti.

«Ulttyq dárilik qamtamasyz etý saıasatyn iske asyrý sheńberinde biryńǵaı dıstrıbútor qyzmetiniń ashyqtyǵyn arttyrý, satyp alý prosesin tıimdiligin arttyrýǵa jáne búdjet qarajatyn únemdeýge múmkindik berdi. Únemdelgen qarjy 26,5 paıyz, ol qosymsha dári-dármek alýǵa múmkindik berdi», - dedi mınıstr.

E. Birtanovtyń aıtýynsha, aqparattyq júıelerdi ıntegrasıalaý prosesi júrgizilip jatyr. Buǵan qosa, dári-dármek retsizdikterin retteý qajettigin aıtty.

«Búkil aqparattyq júıelerdi biz qazir ıntegrasıa jasap, barlyq óńirlerde qandaı dáriler jetkiziledi. Sonyń bárin biz kórip otyrmyz. Biraq, keıbir óńirlerde áli berilmegen dári-dármek nysany óte joǵary. Osyǵan baılanysty qysqa merzimde dárilik zattardyń naqty qaldyqtarymen dárilik qamtamasyz etýdiń aqparattyq júıelerin salystyrý qajet», - dep atap ótti QR Densaýlyq saqtaý mınıstri.

Mınıstrdiń aıtýynsha, aǵymdaǵy jylǵy tamyzdyń sońyna deıin emhanalarda elektrondyq qujat almasýdy aıaqtaý mańyzdy bolyp tabylady. Osyndaı jaǵdaıda búkil dıspanserlik deńgeıde turatyn naýqastardyń sanyn bilýge bolady. Bul keleshekte dári-dármekti durys josparlaýǵa múmkindik beredi.

Aıta keteıik, búgin Úkimettiń keńeıtilgen otyrysy ótti. Onda aımaq basshylary óńirlerdegi jaǵdaıdy baıandap, aǵymdaǵy jaǵdaılardan habardar etýde.