Jaqynda ǵana Almaty tórinen oryn alǵan alyp tıinniń músini  kútpegen jerden qoǵamnyń qyzý talqysyna tústi de ketti. Bul taqyrypty qaýzamaǵan otandyq BAQ qalmaǵan shyǵar, sirá. Tipti, shet eldiń buqaralyq aqparat quraldary da sabannan jasalǵan tıinge eleń etip, ózderinde jaza bastady. Máselen, bir ǵana tıin músininiń aınalasynda bas-aıaǵy 100-den astam maqala basylypty, dep jazady Qamshy.kz aqparat agenttigi Almaty-Aqshamyna silteme jasap.

Bul jobanyń uıymdastyrýshy avtorlary da, brıtandyq sýretshi  Aleks Rınsler de bıiktigi 13 metr bolatyn tıin bir aptanyń ishinde osynshalyqty tanymaldylyqqa ıe bolady dep oılamasa kerek. Onyń shahardaǵy «Atakent» kórme kesheniniń alańynan oryn tepken músini eldegi ózge máselelerdi ysyryp tastap, halyqtyń nazaryn, kóńilin, sózin ózine aýdardy.

Tórt qabatty úıdiń bıiktigimen teńesetin tıin, saltanatty ashylýy bolmaı jatyp-aq, áleýmettik jelilerde kún-tún demeı qyzý talqyǵa tústi. Jáı talqylanyp qoıǵan joq, músindi kádimgi tabaǵa salyp «shyjǵyryp turyp qýyrǵandar da» tabyldy.

Iá, ýysyna jańǵaǵyn ustaǵan beıkúná músin-tıin qoǵamdy ashýlandyrdy da, jaǵymsyz pikirlerge de jol ashty, ereksheligimen tańdandyryp, tańdaı da qaqtyrdy. Áıteýir besiktegi baladan eńkeıgen qarıaǵa deıin eshkimdi beı-jaı qaldyrmady. Bul eko-músinge respýblıkalyq barlyq aqparattyq portal, saıt, telearnalar arnaıy oryn berip, efırlerin, paraqshalaryn arnady. Ásheıinde mádenıet salasyna qatysty áldebir jańalyqtar kózge ilinbeı qalyp jatýshy edi. Bul shyn máninde sensasıa boldy desek artyq aıtqandyǵymyz emes.