Búgin Jarkenttegi Panfılov aýdandyq sotynda otbasyna jetý úshin Qytaı men Qazaqstan shekarasyn zańsyz kesip ótken Saıragúl Saýytbaıdyń kezekti sot otyrysy ótti. Onda eldiń ár óńirinen júzge jýyq jýrnalıs pen qoǵam belsendileri qatysty. Sonymen qatar qazaqstandyq ánshi Merýert Túsipbaeva da balalaryna asyqqan anany qoldap, sot otyrysyna keldi, dep habarlaıdy Qamshy.kz aqparat agenttiginiń tilshisi.

Sot ǵımaraty aldynda jýrnalıserge bergen suhbatynda Túsipbaeva Saıragúldiń sotyna ánshi retinde emes, búkil analardyń atynan barǵanyn basa aıtty. 

"Men de bala tárbıelep otyrmyn. Saıragúldiń shekarany kesip ótip, jolynda kezdesken qıyndyqtarǵa qaramastan balalaryn bir qushaıyn degen sezimin ana retinde jaqsy túsinip otyrmyn. Ana bolǵandyqtan men búgin sot májilisine kelip otyrmyn. Qazaqstandy dúr silkindirgen bul iske adamdar beıjaı qaramasa ıgi bolar edi. Anasy men balasyn bir-birinen Alla ǵana aıyra alady, adamnyń buǵan qaqy joq. Men ánshi retinde emes barlyq analardyń atynan kelip otyrmyn ári anany balasynan aıyrmaýy kerek ekenin taǵy da qaıtalap aıtamyn", - dedi Merýert Túsipbaeva. 

Vıdeo Qazybek Isanyń paraqshasynan alyndy

Buǵan deıin Saıragúl Saýytbaıdyń soty eki márte boldy. 9 shilde kúni ótken alǵashqy sot otyrysy sottyń orys tilinde júrgizilgenine oraı keıinge qaldyrylǵan. Onda sottyń qazaq tilinde ótýi suraldy. Nátıjesinde talap qanaǵattandyrylyp 13 shildede kezekti sot otyrysy ótti. Aıyptalýshy Saıraúgl Saýytbaı Qytaıda ózin ólim jazasy kútip turǵanyn, Qazaqstanda kez-kelgen jazaǵa daıyn ekendigin aıtty.

Aıta keteıik, 25 mamyrda almatylyq belsendiler Qazaqstanǵa kelip, qaıtpaı qoıǵan, sol úshin de qamaýda otyrǵan Saıragúl Saýytbaıǵa memlekettik jáne halyqaralyq deńgeıde arasha suraý úshin áıeldiń otbasy men qoǵam belsendileri baspasóz máslıhatyn ótkizgen. Baspasóz máslıhatyna qatysqan Saıragúl Saýytbaıdyń kúıeýi Ýálı Silám Qazaqstan bıligi men qoǵam belsendilerinen áıelin Qytaıǵa qaıtarmaý týraly surady. "Sottalsa da, Qazaqstanda sottalsyn", - degen edi ol.