Almaty ákimi Baýyrjan Baıbek jumys sapary barysynda qalanyń ınjenerlik jelilerin qaıta jasaý jumystaryn tekserdi. Bıyl jazda megapolıste 12 shaqyrymnan astam jylý jelisi jóndelýde, 120 myńnan astam abonentter úshin gaz qubyrlary keńeıtilip, sýmen qamtýdyń jańa júıeleri júrgizilýde.
Dýlatı kóshesi boıyndaǵy uzyndyǵy 8,8 shaqyrym káriz kolektory ýchaskesiniń qurylysyn qarap shyqqan megapolıs basshysy qalanyń Energetıka jáne komýnaldyq sharýashylyq basqarmasyna jumys qarqynyn jedeldetýdi tapsyrdy.
«Barlyq obektiler merziminde berilýi jáne keshendi abattandyrylýy, jasyldandyrylýy tıis», - dep atap ótti Baýyrjan Baıbek.
Ótken jumys saparynyń qorytyndysy boıynsha Altynsarın kóshesi boıyna uzyndyǵy 2,8 shaqyrym gaz qubyryn tartý jumysy oıdaǵydaı aıaqtaldy. Osynyń arqasynda 40 myńnan astam abonent gazben úzdiksiz qamtamasyz etiledi.
Jambyl kóshesi boıymen Nazarbaev dańǵyly jáne Pýshkın kóshesiniń arasynda jylý jelilerin qaıta jasaý jumystary merziminen buryn aıaqtaldy, qazir munda mańaıdy abattandyrý isi jalǵasýda.
Qalanyń birqatar ýchaskelerinde jumystar júrýde, olar shildeniń sońyna taman aıaqtalady. Jumysy qomaqty ári kúrdeli ýchaskeler tamyz aıynyń sońynda iske qosylady. Mundaǵy barlyq abonentter ýaqytsha syzba arqyly ystyq sýmen úzdiksiz qamtamasyz etiledi.
Sýmen qamtýdyń jáne sýdan bólýdiń jańa jelilerin salý jumystary jalǵasýda. Osynyń arqasynda qalanyń 5 aýdanynyń 120 myńnan astam turǵyny sapaly sýmen jáne ortalyqtandyrylǵan kárizben qamtamasyz etiledi.
Jumys sapary kezinde Almaty ákimi qalanyń tarıhı ortalyǵyn qaıta jasaý jumysyn tekserdi. Qazirgi kezde Abaı, Abylaı han, Nazarbaev dańǵyldary men Abaı alańynyń ýchaskelerinde ınjenerlik jelilerdi aýystyrý, tas tóseý, sýarý júıesin ornatý, nysannyń syrtyn jańartý jumystary júrýde.
Rekonstrýksıa barysynda jaıaý júrginshi, jasyl jelek aımaqtaryn keńeıtý, jańa fontandar salý qarastyrylǵan.
Aıta keterligi, osy jazda Almatyda uzyndyǵy 160 km bolatyn 150-den astam kóshe jóndeledi. Barlyq jer asty ótpeli joldarǵa kúrdeli jóndeý jumystary júrgizilýde. Ortalyqtandyrý qaǵıdasy boıynsha qalanyń barlyq aýdandarynda abattandyrý júzege asýda. Eger ótken jyly qalada 500 aýla jóndelse, bıyl qalanyń barlyq aýdandarynda taǵy da 600-den astam aýla jóndeledi.
Megapolıste sońǵy jyldary 800 km ınjenerlik júıeler salyndy jáne jóndeldi, sonyń ishinde 313 km sý qubyry, 266 km káriz qubyry, 150 km elektr berý jelisi jáne 32,3 km jylý jelisi.
